|
قصه ابو نايف واخوياه في اول المقانيص (حقيقيه ) 1 بسم الله الرحمن الرحيم السلام عليكم ورحمه الله وبركاته اخواني المشرفين والاعضاء والزوار اسعد الله مساءكم اليوم جايب لكم قصه قديمه من قبل حوالي 29 سنه وهي صارت علي انا وصديق الطفوله (ابوخالد)واخي الصغير اردنا المقناص لللآرانب ليلا ونهارآ وكان عند ابوخالد سياره دادسون بكب غماره (وش رايكم نقولها بلغه العاميه :) ابلشتنا الفصحى) المهم ؛؛؛ نويناء المقناص (خميس وجمعه) في مناطق حول الشرقيه مشينا من الدمام يوم الاربعاء في الليل وامسيناء في ذاك الجو الي كله رمث وفي الصباح بعد طلوع الشمس وحنى نظف اغراظنا ؛؛ الا نشوف راعي بليزر احمر يفتر في الجو الي حنا فيه ويدور في محله ؛؛؟؟ قلنا وش عنده خلنا نروح ونسئله ؟؟؟؟ المهم توجهنا له وكل ماقربنا له راح عنا وكئنه مايبغانا ؟؟ المهم مرينا على جرته الاهو يقص اثراول مره نشوفه له ثلاث اصابع ؟ وتشاورت انا وابوخالد قلنا هذه الله اعلم انها جرة حبارا لائننا مانعرفها ؟ وقديما نسمع من الشيبان ان جرتها ثلاث اصابع ’’’’ خليناها ومشينا ماهيب اكبر همنا ـــــــــ واصلنا طريقنا نبغى الحبيبه (الارا نب) والان الضحى الكبير ونحاول نصيد اي شئ لان مامعنا ايدام ولاكن الصيد والخير واجد وفي الطريق كنا ثلاثه في غمارة العراوى قلت لبو خالد وقف خلني اركب بالحوض حتى اوسعلكم .. وانا قصدي اباخذلي نعسه وقف وركبت مع العفش واتغطى بالشرشف واخذت شوى الا احس بالسياره وقفت:: وارفع الشرشف اطالع الا ابو خالد مطلع الشوزل ويزهبها اثريه شافله ضب قال هذا الغدا المهم الغدا دخل جحره قبل مانرميه واصل ابو خالد المسير وانا تغطيت بشرشفي وبعد دقيقه او اقل الا والسياره وقفة والشوزل قرحت واطالع الا ابوخالد(ذيبان) نازل من السياره يركض ويقول ابشروا بالغدا وهو يأخذ الي صاده وهو طير كبير مانعرفه مثل طيور البحر ؟؟؟؟؟؟؟ ونزلت معه نشوف هالطير الا قولت ابو خالد حبارا؟؟ قلنا كثر منها ؟ــــــ وهو يروح للجره وبعد ماشاف الاثر وهو يصيح بالصوت العالي مدموج بالابتسامه من الاذن الى الاذن وبقوله (عليه بالحرام انها حبارا ) تعالوا شوفوا الجره ونجي نطالع الا مثل اللى يقصها راعي البليزر اليوم وحنا نفرح بالصيده الجزله التي تساوى عندنا وقتها (ضبي ) وهذه اول مره نصيد الحبارا ونشوفها على الطبيعه علما اننا الان اهل طيور ونشره على الذي يرمي الحبارا وسلامـــــــــــــــــــــــــــــــتكم امل ان تحوز على رضاكم واستحسانكم وذا شجعتوني يمكن فيه وحده ثانيه في حلقه قادمه ان شاء الله وتقبلوا تحيات اخوكم ابو نايف |
| الساعة الآن 09:57 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir