مريت قصرن بين ذيك الترايع=شرق الحزم طفيت عن اركانه شموع
قد صار به شيخن له الذكر ذايع=مقامه بمقدار الاجواد مرفوع
شيخن تعلا فوق روس الرفايع=صيته شهير بكل الاقطار مسموع
النادر اللي حسه اليوم شايع=ذاك الحناكي في ثرا الرس مجدوع
حدر النصايب فوقه الثلج مايع=كم عين لاجله ثنثر بخدها دموع
على حياته ما اشتكا الضيم لايع=يعطيه من ماله مصاريف واسلوع
يدي من الحسنا صنوف الربايع=واكبار عمرن والمقيمين وانجوع
واطفالهم واليافعين ورضايع=فرايدن واثنين عيلات واجموع
يمناه يلحقها السخا بالتبايع=كفن تريفه تعطي المال بالبوع
ياما شبع من جودها كل جايع=عساه في خط السجلات مطبوع
يلقاه قدامه ولا هوب ضايع=بالدار الاخرى يوم الاتعاب والروع
هذاك وقتن مبلع بليس زايع=مثل الصقطري يبلع جماه ويزوع
عسا الحناكي في ظليل الفرايع=يصير دون النار فعله له دروع
يذوق بالجنات لذة نوايع=ينول من حوض النبي كم قرطوع
مسكانه اللولو وحورن طوايع=يرا خفي الساق فيهن من سطوع
ربي جعلها للوجيه اللمايع=اللي لخالقها على فرضها ركوع
دنيا تفانت بين شاري وبايع=ما فيها للصالح كسيبه ومشروع
حذراك منها يا صحيح الرمايع=طاروحها بين المخاسير ملفوع
عليك بالانفاق تلقى الدرايع=في ساعتن تزويد الاعمال مقطوع