منتدى استراحات زايد - شلعتني شلع الضرووس من الجما

ترى النوايا البيض مكشوفة غما=ياللي تقول أرجوك من شعرك بليز

شلعتني شلع الضروس من الجما=وقصيت عرق القلب قصة سلك فيز

بطن ذلول حيال وقطي دهما=والخد برق اللي رعد هاله رزيز

لاماك جاري نهر وفراقك ضما=ورك وصدر رقم ثمانية إنقليز

من نار عينك عيد ولع واحتما=ماهي على نادر ومثلوث ولزيز

عندك ثلاث أوصاف من ظبي الحما=دق المعنّق والحذاره والفزيز

الموت لو ينشاف والله ينرما=يكفّن الرجال بالوقت الوجيز

من لامني لعل عينه للعما=حمرة شفاهك تقل شاهي بنتليز

زينك منه تغار عذبات اللما=ماء زمزمك واهني من مزه مزيز

صدرك ماضم إلا الزبيدي والكما=على الوصوف اليوسفيه مستحيز

تقلع بجهّيل ومشايخ وعلما=اللي معه تمييز راح بدون ميز

ياليت صدفه ثانية لو ربما=اليتم طفله مايغذّيه الهزيز

أرواح الأحياء ماتعيش بلا دما=حطيتني من دون حر النار "بـيــز"

عسلوجتاً فيها ملوحه وطخما=تعزز المذلول وتذل العزيز

لك مملكة حب وبحر وأرض وسما=حكمتني حكم الملك عبدالعزيز

الشــاعـــر / عـــيــــد ســمــيــــر الـبـشــــري الحرربي

__________________