اميمتي لا شان حالك وانا فيه=حطيت لك يا يوه من بالي احلاه
جميل زولك في ضميري واحاكيه=بنيت لك بالقلب منزال وارفاه
ان قلتي يا وليدي فانا اقول لبيه=سمي وحاضر واطلبي بالشها اغلاه
هوا كنيني ينجذب يم غاليه=وانتي على نفسي نواوير يا ياه
الدين لا بده يسير بمباديه=والوالده فيما ملكناه نفداه
حقن علينا بالجزا ما نغطيه=يكفي زفير الطلق من قيل يقواه
ادعي لها الرحمن ليلي واناجيه=لعلي اكسب من رضا الله حسناه
اويس مقبول الدعا من حسانيه=يميح لامه من قراحه ويغذاه
ترا الفتى يكسب معاليه بابويه=باكتاب ربي آية البر نقراه
من كان له والد كبيرن يواليه=حتى ولو يجزيه من خالص دعاه
قبل يجي يوم اسودن ما يلاقيه=بين النصايب ثاوياتن حناياه
حدر الثرا ساعة تفالت عراويه=في حزتن يا هيه وين انت وياه
يندم على التقصير باتلا مقافيه=يقول ليتي في حياته حسافاه
خصوصا اللي زايد العمر ثانيه=بين اربع الجدران تبرك مطاياه
عن المسافه قاصراتن خطاويه=الحيل ضاعف والنظر سايحن ماه
ما حوله الا الضيم يلوي عضاويه=يبغا الونس ما له سوا صالح ابناه
اليا ضواه الليل فالعين تقزيه=يبي الرقاد وعافت النوم جفناه
ما اطولك يا ليل السهر حين يضويه=واوليده بحضن الحليله تطواه
وهو وحيدن كالحوير رغاويه=من كبر سنه قاصي العظم يفغاه
يبي العوين اللي صغيرن مربيه=لكن عوينه مالك الملك باخراه
حضيض منهو مثمر البر جانيه=يذوق منفوعه زمانن ويلقاه
على الصراط يشوف مجنا مساعيه=اليا حكت ذرعان وانغلقت افواه
يومن على الكفار تكثر بلاويه=وابليس مدحورن تهاوا بعجفاه
يوتى بكبش الموت تنثر مداميه=على الخلود الناس تبقى مداياه
عمر الحياة يدور والناس تمشيه=ربي عسى حسن الخواتيم باتلاه