--------------------------

لا ... ياقديم العٌمر لك عندنا هابه = من دين والشرع من عٌرفي ومنهاجه
من دونها كم تمنى غيرك ترابه = ملّ الحقوق وحكي من ناس هراجه
جاه الجحود بعدد ماعاش يجزى به = وجاك الوفا نورٍ وجهك زاهي سراجه
لا ضاق وجه الزمان وكشر بنابه = وعدٍ علينا غصب يضحك لك حجاجه
لكن! رضيت الهوان ورحت بركابه = وأمرضت قدرك وهذا يصعب علاجه
طاب الرجا من طبوعٍ فيك كذابه = أتعبتها لين شاق العز لـ أبراجه
رجل الخطأ عمرها مادلت أبوابه = لو بالقدم..؟ كانها لأقدام دواجه
العز لـ الي عزيز النفس يهنى به = والذل صنعة ذليلٍ صانع إحراجه
شفت الردى صار مثل الطيب متشابه = متساويٍ في رخوم الوقت ونعاجه
بالعين هذا حضوره كنه غيابه = ضمن التجاهل يعدّ ولاهي إزاعجه
ياشيخ شاب البياض وشابه وشابه = حب الخشوم لعظيمٍ غايته حاجة
حاولت الاقي العذر وأعدّي أسبابه = وحاولت فكري يموج العيب ولا ماجه
صعبه تدارى بعد ماكنت في ثيابه = وان قلت تهمل تماريها السماجه
سموك صقر القصيد ولابتك لابه = ربعن تشب الظلام شموس وهاجه
فيهم هقاوي .. ومثلك مااتهقوى به = من هو كفخ بالكرامة وين معراجه؟
لاشك للذل كسر الطيب ومخلابه = ولا شك يحظى بجمع الهون وافواجه
منك النظر لعموم الشعر وأصحابه = شحذه / نفاق / افتراء / اكفوف محتاجه
عن مثل هذا نهيت النفس تحيى به = سقّيت بعذب الصفات وخلّت هماجه
ماقلت شعري إذا مابحسب حسابه = ولا لي بغاوي يعشق العذب ولجاجه
مربى المدينة ولكن فيني ذرابه = تاج الكرامة براسي مانزل تاجه
من أب من عم من جدي ومن جابه = محكوم عالي ولا منّا نوى افراجه
الذيب ذيبٍ ولو ما عاشر ذيابه = وأما الصقر لو يدجّن يصبح دجاجه