|
شـو رايكم ف هـل المنطقـه الفلانيـه ... [align=center]السلام عليكم ورحمة الله وبركاته وبعد .. العنوان ماله دخل بمغزى الموضوع يا أعضاء لكني حطيته .. عسب اكوّن لكم صوره عن محتوى الموضوع .. ,,, سلمكم الله .. وشرات ما نعرف الكل منا يفتخر فالاماره اللي يسكن فيها ,, واللي يقولك ,, انا من دبي ,, والثاني يقولك انا من العين ,, و الثالث يقولك انا من الشارجه ..... الخ زين .. ما تلاحظون شي ,, ما تلاحظون انه صرنا نسوي تفرقه حتى داخل الدوله . يجيك شخص يقولك .. دبي أحسن من بوظبي .. ويجيك آخر يقولك لا .. بوظبي أحسن من دبي .. واللي يقول هل المنطقه الفلانيه ما شايفين خير ,, واللي يقول مدري شو .. ولا جنه انه الكل من دوله وحده ,, وهي الامارات العربيه المتحده . يا اخوان .. مب جنه نحن مسوين احزاب يعني .. مب مكفنا التفرقه اللي عايشينها في عالمنا العربي أو بالأحرى عالمنا الاسلامي . .. الخلق يحاولون يوصولن للوحده العربيه .. ونحن هنه نقول هل المنطقه الفلانيه .. أحسن من المنطقه الفلانيه .. شوفو وين كنا .. ومن ثم وين صرنا . سابقا يا أعضاء ,,, كنا أمه عربيه اسلاميه موووححده ,, وبعدين بدينا نفترق شوي شوي الين ما كل منطقه سوت لها دوله واستقلت ,, الين ما كل شخص يقول انا من الدوله الفلانيه ,, الين ما قالوا اونه ,, الامه العربيه غير ,, والامه الاسلاميه غير الين ما قامت الحرب امبينا ,, ومثال بسيط على ذلك ,, (( حرب العراق والكويت )) . ونحن يا اعضاء . كنا مجموعة امارات ,, الين ما ربنا فتحها علينا ,, وغدينا دولة الامارات العربيه المتحده . يعني التم الشمل شرات ما يقولون الحين أشوف البعض يقول ,, الاماره اللي نحن فيها ,, أخير من الاماره الفلايه يعني مثلا .. العين اخير من دبي . ,, ليش هالتفرقه يعني ياخي كلنا من دولة الامارات ليش تبون تسوون تفرقه ,, بعد ما توحدت الدوله أيام شيخنا المرحوم زايد (( الله يغفرله )) ,, يمكن الحين ما بتبين العواقب .. مع انها امبينه بشكل متوسط لكن مع قدوم الأجيال اليديده ,, بتنمو لديهم أفكار يديده فيا أخوان .. اللي من دبي واللي من بوظبي واللي من العين والشارجه وعيمان وام القيوين وراس الخيمه والفجيره كلهم من دولتنا الحبيبه ,, دولة الامارات العربيه المتحده لا تفرقون بين اماره واماره وخلونها نكون كلنا يد وحده .. ترا الضعف اللي عايشه فيه الامه الاسلامه سببه هالتفرقه ,, وانهم مب على قلب واحد ,., أرجو اني وصلتلكم الفكره ^^ وان شا الله ما اكون مطوّل فالكلام .. كل الموده والغلا .. إعداد الموضوع : خالد الشامسي[/align] |
وعليكم السلام والرحمة تسلم أخوي النورس على طرحك للموضوع والله يعطيك العافية وصدقت في كل كلمة كتبتها وبالفعل قمنا نلاحظ هالشي منشتر بينا بشكل كبير وكل واحد يفتخر بالأمارة أو المنطقة اللي هو منها وايقلل من قيمة المناطق الثانية وهالشي غلط لأنه كلنا أعيال الشيخ زايد الله يرحمه وكلنا عيال دولة وحده وما في فرق بينا صح كل واحد ايحب ويفتخر بالمنطقة اللي انولد فيها واتربي وعاش فيها بس بعد ها ما يمنع أنه انحب باقي المناطق فالدولة وأنته ما شالله عليك كفييت ووفيت فالطرح والله يعطيك العافية وما قصرت |
وعليكم السلام ورحمة الله وبركاتة اقتباس:
اخوية خالد الموضوع هذا انتشر لدرجة ( الزواج) من الإمارات الأخرى اصبح شبة مرفوض ، يعني اييك نوع من الأهل مثلا ساكنين فالعين ، والريال يبا يخطب وحده من امارة اخرى خلنا نقول الشارجة او عيمان والرفض يكون بسبب ( والله مانعرف عنهم ، والله الدار بعيده شو يوديك مناك ) لووووول !!! عيل اللي يبا يخطب من قطر ولا سعوديه شو بيقولن بعض الأمهات لووووول .... انا ارفض هاي الفكرة السائده هالأيام بخصوص هالموضوع ، ونحن كلنا مسلمين ومن تراب والشيخ زايد لو كان موجود وسمع هالكلام مابيرضى بالعكس بيزعل وبيقول ماهقيت شعب دولتي تفكيرهم جذه عقيـــــــــــــــــــم! الله يرحمه ويغفر له ويسكنه فسيح جناته اخويه خالد عاده ماوصيك نباك تكتب لنا مواضيع طيبة من اناملك الطيبة لووووووول ، نحن نبا نكسبك كعضو واخ لنا فالإستراحة طال عمرك ... تسلم وماعليك قصيره اخوك/غديّر النعيمي |
تسلم اخوي على الموضوع.. وصح صارت الحين وايد تفرقة بين إماراة و إماراة وفرض الأفضلية للإمارة الأحسن ونحن كلنا عيال آدم وحواء وكلنا فينآ الخير والبركة..ونحن ربينا على اساس ان كلنا اخوان ف الاسلام وأشياء وايد تربطنا..والله لا يفرق ين انشالله.. ارد اشكرك اخوي على الموضوع.. تحياتي |
اقتباس:
يسلمج ربي لمحبينج ختيه سلامه .. ومعاج حق الواحد من حقه يفتخر بالمنطقه اللي انولد فيها لكن مب على حساب المناطق الاخرى ,, او بالأحرى مب على حساب الدوله ^^ .. ولج كل الشكر على مرورج الراقي ختيه نورتي الموضوع بطلتج دايم تسعديني بتواصلج الجميل ربي يحفظج ويرعاج |
| الساعة الآن 05:06 AM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir