اسامر حلوك الدجى والتهيبه=بين الصحاري عسعس الليل جذاب
نوبات خرماس البهيم استطيبه=باقصى الفيافي بين شعبان واهضاب
سجيت باسبوتي سواة النجيبه=حمرا النضا ما يثني الورك ركاب
القيظ فينا حزتن نرتخيبه=مير المولع ما حجز دونه الباب
سريت بالدلجه ونفسي رغيبه=لعلي القا بالخلا راس مرقاب
اريد اعدي عالين وارتكيبه=زما على الصحصاح واطلالن قراب
لقيت هضبه بالنجود التعيبه=فيها الذرا والما على السفح ينساب
واشجارها دون السموم ولهيبه=دوح الصحاري حدرها جرف محطاب
تكيت والرمضا تزايد شهيبه=هاج السراب بواسع القاع شحاب
عبيت قربه من ثميلة شعيبه=صافي قراحن ما زحف حوله الداب
علقتها حدر الغصون الكريبه=واوما بها صلف الهوا بين الاهداب
شبيت من عوج الجذوع الصليبه=دخانها يشدي مفاويح الاطياب
سويت دله كايفه واعتنيبه=فيها الهراري واخضر الهيل جذاب
والزعفران من افخر النوع شيبه=والشاهي مخدر على جمر الاخشاب
والذيب من فوق العوالي قنيبه=يبي الغنم ترعى مباذير الاعشاب
تقول حارس تاركينه رقيبه=يبغا العشا رزقه على رب الارباب
شحيح صيده عاش فتره عصيبه=يومين ما عض الفريسه بالانياب
بيدا تناها صيدها وش يبيبه=يلقا بها ضيم الضواري والاتعاب
يا ذيب اشوفك مرتخي للغليبه=هذي هي الدنيا تساهيل واصعاب
وابن ادم الفاهم خصيمه حسيبه=الخالق المعبود فراج الاكراب
نرجيه جنات الخلود الرحيبه=مع النبي الهاشمي ويا الاصحاب