جيت الوهابا مبعدين الهقاوي=اللي عليهم سور قلبي تهاوا
هواهم المكنون بين الحناوي=وابدا لهم قافي بيوتن تضاوا
جنوب سلمى يم ذيك النحاوي=شمال غسل وما شكينا العناوا
مديتها قبل الصباح السناوي=من فوق موتر ماشين بالنحاوا
ميه وعشرين المسير المداوي=وان زاد فاذياب المخاطر تعاوا
جيت البعايث وامسك الدرب طاوي=لين الشعيب اللي ملته الذراوا
لقيت ذربين الدروب القصاوي=والطيب والخوه وطبع الهداوا
ناسن عليهم تستميل المناوي=حجانهم والبدر الاكمل تساوا
ذولاك عيله من ظهر ذيب عاوي=سبع السباع مكرمين العزاوا
نصيتهم والنار نار الخلاوي=اللي مع فجوج الوسيعه تلاوا
والسكريه والقدوع الحساوي=والدلة الصفرا بجمرن لضاوا
قضينا قيلتنا بوقتن عذاوي=يومين ما فيها مهول البطاوا
من بين ضلعانن نصاها النداوي=طير الوحش ما مهدوه بغطاوا
باقصى شعيبن ما رعى فيه شاوي=في طلحتن قلنا تحتها سلاوا
والحمد للي مهلكن كل غاوي=اللي رزق من جود فضله غناوا