يا زين الاجوا تالي الليل يا ناس=على سمانا والنسانيس حيه
جتنا من القبله مثل نور الاعراس=سحابتن نوحي صليف رعديه
سودا عليها من التباريق مقباس=مسافة الاميال نوحي دويه
رشيقها فوق العشش كنه اجراس=وابلها يضرب بالسهول الضميه
صبيبها يرشق كما سهم الاقواس=على الحماده والرضم والشغيه
تلايمت كل الجذايب بالاطعاس=والنابي تضرب شغيته من عليه
لين استفاض السيل وادعوبها رجاس=ساحت على الشعبان لين العشيه
زادت مجاريها على كل محباس=لين ارتوا حزم الوطا الديهريه
نوحي هدير الما بالاقفار منحاس=مثل هدير الهرش حول المطيه
شعبانها قامت تعاوا بلولاس=بين المحاجر والجروف صفقيه
سيلن حقيقي ما عليه التهجاس=تاتي علومه من حدا العارفيه
اللي سروا للغيث في كل مرماس=نوبن لقوا رشن ونوب برديه
زان الهوا وامسا بالاقفار نسناس=والنار توضي حولها الشاذليه
تزيل عن روس الكشاشيت عوماس=والشاهي مخدر ونفسن رضيه
هذي حلاة الوقت والموت دواس=بامر الولي يقبض نفوس البريه