يا حيف يا ربع السنين المدانيق=ما فيكم اللي مع بطا الوقت مشتاق
تقفون مع سود المزون المباريق=ولا لكم شاهد على رشوق الاوداق
مثل الرماد اللي بقاع البريريق=يزول لو ياتيه فنجال رشاق
نهيت نفسي عن كذوب التلافيق=دون التماكير بمغاميز الاحداق
سجيت بالخاطر غروب وتشاريق=ودليت اراجع بالزمن عرف الامزاق
لقيت خلق الله وعور ورقاريق=سبحانه اللي موجدن كل الاطراق
وين الرفيق اللي على اليسر والضيق=ذاب بهماج الما ولا عاد ينذاق
كايم سواة الملح لين التراشيق=مثل القطا الجافل عن الشرب نغاق
والا كما بالقيظ عود الزماليق=راح برميم الصوح واترابن دقاق
مقسوم والا ما رجينا المخاليق=على ولي العرش تفريج الاضواق
نرجيه تعديل الظروف المعاويق=ولا لنا غيره ولا عنه منطاق
عمارنا تمضي بليا ترافيق=والموت لارواح للمخاليق صفاق
اليا لفا ابن ادم على يبست الريق=ترفع بها التوبه وتطوا بها اوراق
تاتي سهوم الموت فينا دراريق=تسحب ثبات الروح من كل الاشناق
يفوق دقات الحديد بمطاريق=واشد منها بالبشر ساعة فراق