|
مشاركة سوالف هذي بعض السوايف التي جرت من بعض الرجاجيل مع الحريم والله انها تضحك ولا تنقدون علينا .... بدايتها وحدة تقول مره وصلني زوجي للمدرسه اللي كنت معلمه فيها الصباح قلت له وانا نازله: راح اشتاق لك ياحبي .. قال: انزلي انزلي لا تروح عليك الحصه الاولى .. آآآآآآه بغيت اصفعه بالمسطره عاد انا وش اقول والطويله اللي معاي -------------------------------- ووحده ثانيه تقول: زوجي موراعي هدايا ابد قلت ابشتري هدية له الجوال الي يستخدمه قديم المهم غلفته وكاتبة في كرت شعر وكلاااام حلو وعطيته الهدية وكنت بجنبة فكه بشراسة وجهه فيه علامات استغراب وتعجب وانا مبتسمة طلعه وناضرة قال: لمين هذا قلت لك: حبيبي قال: شاريتة بالفين وخمسمية يابنت الكلب هو فرحان بس شوفوالتعبير قسم بالله ذبلت ابتسامتي وهو يضحك يقول: اول مرة احد يهديني بالمبلغ هذا بس تصدقون رحمته -------------------------------- وهذي وحدة ثانية تقول انها حطت شموع من عند الباب الغرفة النوم والشموع طبعا على الارض وهي جلست في غرفتها وكاشخة وتنتظر زوجها المهم دخل الطعس ودعس الشموع برجلينه وقام يصارخ ويتألم وكفخ زوجته وزعل عليها وتكلم عليها وماخلى شي ماسواه والمسكينة انهبلت من اللي شافته المهم الزوج دخل الغرفة وقفل الباب عليه ونام بلحاله والله هالحرمة مواقفها كثيرة وتضحك بس للاسف الحين تطلقت ماتنلام تطلب الطلاق --------------------------------وحده من البنات ملت من الروتين اليومي في حياتها وحبت انها تسوي مفاجئه لزوجها بسهره رومنسيه ... المهم قامت واطلبت الكيكه من الدبلوماسي والعصيرات وخلت الاضاءه بالمجلس هاديه وولعت الشموع ونومت عيالها وتزينت عشان تهيئ الجو لهم المهم جاء الزوج من الاستراحه وريحته تفاوح دخاخين واستقبلته ودخلته للمجلس وقصت له من الكيكه وصبت له من العصير المهم يوم بلع وخلص قالها: الحين وراك مجلستنا بالظلام حشى كأننا بقبر تقول هي انها بلعتها وسكتت منب مخربه السهره قام وكمل ذا الماصل وقالها: الحين وراك طالبه حجم كبير من الكيكه كان طلبتي حجم صغير وشوله الاسراف يالله روحي قومي البزارين ياكلون منها عشان ماتكب عاد هي حامت كبدها منه وطفسته وزعلت عليه تدرون المفروض انها تحط له خبز وفول ويخب عليه هذا مهب وجه تدليع (جعله الضربه ذا البخيل)--------------------------------هذي وحده من البنات توها متزوجه وحابه تسوي حركه لزوجها .. قامت وتزينت وتجهزت من مجاميعه وحطت الاضاءه هاديه وشغلت الدخان الصناعي وانتظرته لحد ماشرف المهم يوم دخل ويشوف الدنيا شبه مظلمه والدخاخين حاجبه الرؤيه قام يركض للصاله وجلس يناديها وهي ساكته ماترد عليه تتغلى عليه (على بالها حركه ماتدري مسيكينه انها بتروح في خبر كان) عاد هو طار للمطبخ وجاب جيك ماء وكبه عليها يحسبها انه مغمى عليها من الدخان عشان كذا ماترد عليه (جاء بيكحلها عماها) بالله وش تتخيلون موقفها ؟؟؟ المفروض انها صبت على راسه موية نار-------------------------------- هذي وحده من البنات تزوجت وراحت للخارج مع زوجها بعثه للدراسه له ولها المهم شافت ذا الحمران العطران ورومنسيتهم قالت خل اسوي مثلهم وخاصة انهم كلهم يدرسون وكل واحد فيهم وقت دراسته تختلف عن الثاني فما فيه وقت للجلسه الهاديه فقامت يوم من الايام قبل ماتروح للمعهد قالت خل افتح نفسه شوي لما يرجع تعبان ويبغى ينام شوي ونثرت على السرير ورود والعطورات الفواحه تفوح في الغرفه ومن ذا الحركات قالت: إذا رجع وشاف الحركات هذي اكيد بيستانس شوي المهم يوم رجعت من المعهد شافت زوجها نايم في الصاله عاد هي استغربت وراه تارك السرير ما امبطح عليه ويوم صحى وسألته قال: الله يصلحك ناثره لي عشب على السرير وشلون انام عليه (الله يقلعه مايميز بين الورود والعشب) .. بالله مو المفروض تنثر على السرير تين شوكي عشان يتأدب ذا الباصق--------------------------------وهذي وحده تعشق شئ اسمه رومنسيه وكانت دائما تعزم زوجها في مطعم راقي على حسابها يعني تغير من جو البيت وروتينه وكانوا دائما يسون ذا الحركه وهو وجهه مغسول بمرق كل ماطلعوا يطلب كل مالذ وطاب على حسابها عاد هي جتها ام العبيد وقالت: انا اوريه عشان يتأدب ويعزمني بدال ما انا أعزمه قامت وعزمته زي كل مره ويوم خلصوا ماكلين قالت له: اكرمك الله ياابو فلان على العشى عاد هو شرق بالعصير من الروعه , قال لها: وشلون يعني ؟؟؟ قالت له: الله يسلمك الفاتوره دفعتها من جيبك اخذت المبلغ من بوكك قبل مانطلع تقول عقبها طاح وجهه تأدب وصار يطلعها كل سنه مره (تعب نفسه صراحه)--------------------------------ووحده لاهي ولازوجه يدلون الرومانسيه وكانت بيوم راح تنقل لبيت ملك المهم شارت عليها إختها إنها تشتري حركات فطلعت مره هي وزوجها يشرون شموع اشكال والوان وبعد فتره هي كان زوجها طالع وإستغلت الفرصه وإدهرت تضبط البيت وتكشخت وشغلت الشموع يوم جاء المحروس شاف الدنيا ظلام يوم دخل على زوجته ولع النور وطفى الشموع قالها: الله يهداك الحين أنا شاريهن لاطفى الكهرب>>>> طعس صحيح . --------------------------------وحدة تقول مره سويت لزوجي ليله رومانسيه على قولتكم وقمنا نرقص هذيك الرقصه وش اسمها ايه سلو الي تحطين يدك ورى ظهر زوجك وهو يحط ايده ورى خصري وكنت منسجمه مع الجو تخيلوا وش قال قال: تكفين تكفين حكي ظهري فوق شوي لالا تحت شوي الله يخليهم لنا مع تحيات ..اخوكم..راعي المبهرة |
| الساعة الآن 09:37 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir