|
سوالف يوم كانت الرصاصة اغلى من الذهب الآن وين اجوال الظبا وياحزني على الضبان اكتب هذة السوالف في عام 1431 هـ وللأسف الشديد ,, ان الضبان في الطريق الى الإنقراض وفي هذا التوقيت والضب الآن يتعرض لهجمات شرسة وضارية من قبل الصيادين واقل مجموعة على مانسمع لايرجع باقل من 50 ضب بعد ان كانت تلعب وترتع من كثرتها في ارجاء كثيرة من الجزيرة العربية قبل 3 سنوات ذكر لي احد الزملاء ان مجموعة من الصياديين عزموهم بعد رحلة مدتها يومين فقط تدرون كم حصيلتهم 300 ضب انظروا مدى الإسراف لاحول ولا قوة الا بالله العلي العظيم يحدثنا ابو محمد من القصيم بعد ان تشرفنا بزيارتهم لنا هو وابو عبدالرحمن ( المرير) يقول كان امريكي من ديانة لانود ذكرها كان في آرامكوا قبل اكثر من 50 عام طلب منه افراد البعثة الصيد في الصحراء قال لهم وباشارة من اصبعه لاتذبحون الأنثى فقط الذكر واحد فقط عندها اصطادوا انثى فغضب وقال الآن انتم قتلتم عائلة.. والدي اطال الله في عمرة بعد ان استرجعنا الذكريات في صيد الضبان وانا صغيراً في سهل ركبة بجوار عشيرة عندما كانت بأعداد كثيرة والآن لاوجود لها الا ماندر وياليتهم خلوها في حالها يقول فناء الصيد يرجع لشبع الناس وتوفر المال بكثرة بين ايديهم وصار كلٍ يقنص ومعه سلاح ورصاص ومواتر بعد حتى الوراعين بعكس قديماً وين القناص معدودين جداً وعرفني بمن كان يصطاد حول عشيرة يقول كنت في اول شبابي واصطدت تيس بسلوقي في حرة بس المجاورة لعشيرة بوادي سوارق.. يقول كنا صغار نرعى الغنم ونحوش الغنم قريب من الخرمة ,, والظبا اجوال تحتاش امام غنمنا وجانا فلان رجل قناص معه 10 رصاصات نقولة اذبح لنا ظبي قال وش ابابها والله ماني براميها ,, يقول والدي لانه صعبه رميتها والصياد محتفظ برصاصة لأواقت محسوبة يحتاجها يقول ابوي الله يحفظه صنعت لي مدرجة حبه مدورة نضعها في المقمع واحط شوية بارود عشان ماتضيع وارميبها الأرنب ,, اللي تدبي في الأرض من كثرها واذا رميتها اتبع جرة المدرجه في الأرض البكر الصافية لين القاها ثم طلبها مني احد القناصين من قبيلة مجاورة اكبر مني صياد ظبا وذبح بها 5 ظبا يقول ابوي في قصة قديمة كان قناص معروف اظنه الخلاوي يرمي الظبا بالمقمع يقول ابوي كان ماعنده الا مدرجه وحدة ويحط شوية بارود عشان ما تروح بعيد وعلى هالمنوال يضربها الظبي واحياناً تبقى في صدرة ويستخرجها واحياناً تخله ولاتروح بعيد يقصها ويلقاها وفي احد المرات نسي وزود البارود ثم اطلقها على احد الظبا وعوت يقول درى انها طلقة قوية ثم عوا الخلاوي ,, وصاح قال ياجوع عيالي جوعاااااااااه .. دلاله انه فقد المدرجة ولا يوجد مدرجة اخرى وين الظبا والنعام العربي وغيرها انعدمت تماماً ,, الآن لابد ان نعلم ان الحضارة المقيته ضريبتها .. فناء وتدهور الطبيعة من اشجار ونباتات وحيوانات ,, والجهل الجهل الجهل |
| الساعة الآن 05:06 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir