منتدى استراحات زايد - قصيدة للشاعر راجح العجمي

السلام عليكم ورحمة الله وبركاته

هذي قصيدة اعجبتني

يقولون ماللعبد بد عن المقسوم
وأنا أقول صح ويقنع العبد مقسومه

عسى الله يعين اللي توافد عليه إهموم
هموم تخلي طبلة الراس منجومه

ترى والله انه مايكدر عليك النوم
سوى كلمة من بعض الاصحاب مسمومه

إليا جت من الغالين وإلا الرخوم رخوم
ولا أمحق من الغالي إليا شانت علومه

ضعاف الروابع تبتلش والقروم تشوم
ولاهي يلاشيمة ٍ من الشيم مليومه

ولا أزين من القاع الخلى والوجيه سلوم
ولا رفقة بعد طول الايام ملغومه

ولا ألذ من عشرة شريف من أقصى القوم
يبادلك فعل الطيب معناه وسلومه

ولا شفت في جو الصداقه غبش وغيوم
عطيت الدروب اللي مع الارض مرسومه

ولا مثل عز النفس لو مامعك مطعوم
وعن أهل الشماته خل الاسرار مكتومه

معي لو سمحت شوي عقب عداك اللوم
أبعطيك عن بعض الرجاجيل معلومه

ترى اللاش لو وقف معك في حياته يوم
تشوف الردى متبين فيه من يومه

وأنا أقول لو إن في وجيه الرخوم وسوم
عرفنا نميز قيمة النذل بوسومه

علشان نجلس مع رجال الوفى ونقوم
ونبعد من اللي عند الاجواد مذمومه

وأنا أسمع مع أهل التجربة في الحياة علوم
بعضها صحيح وبعض الاخبار موهومه

يقولون وكر الحر ما يعتليه البوم
وأنا شوف عيني وكر حر تحت بومه

للشاعر راجح ال شامر العجمي
تقبلو تحاتي