منتدى استراحات زايد - البحر يرفضني !!! ارجوا من الجميع قراءة مأساتي!!

بسم الله الرحمن الرحيم
السلام عليكم ورحمة الله وبركاته ..
ادري اني مبتدي واثقلت عليكم باسئلتي ولاكن يبدو ان البحر لايريدني ولايرحب بي..:(
هذا ما استنتجته من محاولاتي التي اخبرتكم بها سابقاً ..
من محاولت الصيد العديده والتي بائة بالفشل جميعها ..
وخير دليل ما سئرويه لكم الان ..:(
واشهد الله على مصداقية القول وان لا ازيد حرف عما حدث لي..
القصه حدثت يوم الخميس..
الساعه 10مساء باستراحه بشمال الطائف..
تصفحت ان واحد الزملاء الخيمه البحريه كالعاده ولفت انتباهنا موضوع لاحد الاعضاء يتكلم عن سقاله مهجوره بالشعيبه قرب التحليه ..
وتم تحديد موقعها بناء على الوصف والبحث بين طيات الشبكه العنكبوتبة ..
وبمساعدة الشهير بقوقل ايرث تم تكهن بمكانها..
وشد الرحال بعد المرور بسوق السمك بالطائف واخذ حبار وساردين كطعم ووضعه بترمس وثلج لكي لايتغير ..
وشراء اتريك مصدر مضيء بالغاز ..:good2:
بسم الله تحركنا وهنا وهناك والى التحليه وبعدها يمين من عند الوايتات..
وخط ترابي بجوار الساحل الى ان وصلنا لدوريه لسلاح الحدود او خفر السواحل وسئلناهم ووصفو لنا المنطقه وبالفعل وجدنا سقاله خرسانيه شبه مكسوره ولاكن بها جزء بسيط يكفي لاربعه او خمسه اشخاص..
وكان العمق مناسب جداً ..
اخذنا الاغراض وولعنا الاتريك وياسلام تعال شوف ..
وربي السمك اشوفه بالماء بدون شي..:good2:
انواع الاحمر والابيض والطويل والقصير..
ابد ..
بالميات وربي هذا الي شفته ..
بيني وبينكم انا بغيت اتشنج وانا اركب في القصبه وهاتك اربعه جلبان وتركيب سنانير واثقال وطفايات ..
وشغل الي يشوفني يقول هذا ولد بحر خبره ..:good2:
صديقي انبهر مني وقال (( هب يالحوات ))..
المهم ركبنا والسمك يتراقص من حولنا ..
ونرمي السنانير والجلب..
ابد ..
الحين شوي..
لاممكن الساردين ما يشتهونه في هذي المنطقه خل نجرب الحبار..
وهاتك ..
طلع ونزل والطعم زي ما هو..
قلت ممكن السنارات كبيره ؟؟
او الطعم كبير؟؟
جربت جميع الاحجام وجميع الربطات وجميع الحركات الي تعلمتها عندكم ..
وصورت كل شي للتوثيق..
جربت ارمي عميق واشيل الطفايه ..
وجربت احط الطعم على سطح الماء لمشاهدتي السمك بانواعه على سطح الماء..
وما فيه فايده ..

وربي اشوف السمك يجي على سطح الماء يشقر على الطعم من جنبه .. ويمشي..

اتخيل السمك يناظرني ويقول الله المستعان ..
البدوي ذا ووجه يسوي فاهم :(
ياخي رح مطعم وريح نفسك..
يناس ولا وحده تنازلت تاكل الطعم بس والا تدق في السناره ..
والله من الساعه 1.30 صباح الى ان اشرقت الشمس..
على هذا الحال..
وانا اشوف انواع السمك ..
ولا وحده قربت من طعمنا ..
المهم صلينا الفجر واشرقت الشمس وجانا واحد من الشباب..
نطيت بحلقه انت من مكشات ؟؟؟:eek:
؟؟
قال شنو مكشات ..
يبو الخيمه البحريه ..
قال لا والله..:(
احبطت ..
الرجال معه سناره وصحن فيه اخطبوط ..
وكيس مادري شفيه ..
المهم قلت لابو حمد (( ابو حمد خويي)) ,,
اجلس ما نبي سمك نبي نشوف هذا الادمي وش يسوي وكيف يصيد ..
ابد دقينا التكوه ..
والادمي يسمي ويرمي سوى القصبه حقته وحط فيها سنارتين ..
وقصص من ارجل الاخطبوط وحطهم فيها ورماها ..
المهم دقيقتين وجرها ..
والا هي نشبانه (( مصخره في الصبه )) ..
قصها وقال يا شباب عندكم سنانير..
قل ابد ..
تعال نق الي تبي محل متكامل في شنطه ..
عاد الاخوان بالخيمه ما قصرو حطوا موضوع كامل عن احتياجات صائد السمك في شنطه ..
وانا طبقت الي يقلون بالحرف الواحد ..
اخذ له سناره وزبطها ..
ورمى قالي ارم انت قلت ابد انا عندي اكتئاب من السمك وما يبوني وما بافرض نفسي عليهم ..
ضحك وقال والله لترمي..
قلت ملزم ...:D
قال ارمي يشيخ الدعوه وناسه ..
المهم رميت السناره ..:mad:
وجلست يمكن دقيقه وسحبتها سحبت خيطه معي وشعبكه واقع الثنتين وركب من جديد ..
قال ارمي من الناحيه الثانيه ..
المهم والله اني ما كذبت عليكم بشي ومسكت السناره وانا الي اسحب موصدق..
انواع العض على البراطم بغيت ابلع لساني من شدة الفرحه ..
وانا الي اكسر الذراع حق المكينه حقت القصبه قلت فدى بس ما تروح السمكه ..
وانا امسك الواير بيدي وارمي القصبه واسحب ..:mad:
خويي تشنج في الزاويه ..
واسحب وتطلع وحده شعور على كلام الاخ ..
اكبر من الكف بشوي..
قل زين ترقينا من ابو نقطه في المره السابقه لشعور اليوم ..
اعطيتها ولد صغير كان معه قلت يفرح فيها عسى الله ان يرزقنا بسببه ..
المهم السناره(( القصبه ))انكسر ذراع المكينه فيها .
قلت نردها جلب..
الحظ ابتسم على الصباح ..:D
ركبت اثنين ورميتهم ..
يناس اشوف السمك والله اشوفه بنفسجي واصفر الحين على النور المنظر مبهر صراحه تشوف الشعب والسمك يلفلف ..
وانت بالسقاله ..
المهم وقع المحذور..
زحلقت وطحت في المويه ..
:p

وانكسر اظفوري وانصلخت ركبتي..
وانحرق جوالي ..
:eek:

ضحكت من اعماق قلبي..
وربي البحر ما يبيني..
يا اخوان .؟؟؟
ليش السمك ما ياكل الطعم وانا اشوفه بالعين المجرده بجميع الالوان والاحجام ..
هل السمك يرغب بطعم معين؟؟
هل هنالك وقت ما ياكل فيه السمك؟؟
هل الرياح تاثر على السمك وانه ما ياكل؟؟
هل هنالك وقت السمك يكون فيه شبعان يعني؟؟
؟؟
هل الطعم لابد ان يكون من صيد نفس اليوم؟؟
تسائلات غامظه بالنسبه لي..
انا جربت المجرور وكتبت لكم في رابطة المجاري عن سالفتي وعن المطوع الي امتحنته بفليني..
وجربت اصيد في جده العديد من المرات وكتبت لكم عن مأساتي..
والحين جربت بالشعيبه وهذا الي حصل ..
وش تتوقعون السبب ..
هل هنالك اناس يرفضهم البحر؟؟
هل قد صار لاحد الي صار لي؟
اسف للاطاله ..
اما بالنسبه للصور فقد ذهبت مع الجوال..
ولاكن هنالك بعض الصور التقطها صديقي ساضيفها لكم قريباً ..
اتمنى من الجميع المشاركه ..
دمتم بود ..:good: