منتدى استراحات زايد - صديق ابوي صديقي (( اختيار الصديق ))...

بسم الله الرحمن الرحيم

هذي قصه قديمه صارت وفيها من الحكمه الشي الكثير والي جرب في هالدنيا

بيعرف القصد من هالقصه والي ماجرب يجرب ...

وتذكرتها لأن الي كان يقولها لنا شايب الله يرحمه ويغفر له وكثير مايرددها

وماعرفنا قيمتها الا بعد فتررررره طويله وغدر بعض اصحاب المصالح

الماديه ...

كان في احدى قرى نجد رجال وعنده ولد , وهالولد عنده ربع كثيرين وكان كل يوم

يضيفهم عنده في البيت ويعشيهم , ابو الولد شاف ربع ولد ماهم مضبوطين وحس

ان العلاقه علاقة مصالح علشان العشاء والمقلاط جاء لولده وقاله ياولدي ربعك فيه

ومافيهم وقام يعدد عليه الي شافه عليهم بحكم خبرته في الحياة الولد ما اقتنع وقال

يابوي هذولي اصدقائي ومن هالكلام , قال الابو لهالولد ربعك بنسوي لهم اختبار

ان اجتازوه فهم ماعليهم كلام ورجال ينشد فيهم الظهر وافق الولد على هالاقتراح ,

قال الابو لولده بعد ماطلعوا ربعه في الليل من عنده رح طق على كل واحد منهم

الباب وقله قدر الله علينا انا وابوي وذبحنا لنا رجال ونبيك تعاونا ندفنه قبل الناس

ماتصحى لصلاة الفجر وتدري عن فعلنا , راح لربعه واحد واحد وقالهم وكل واحد

صار يصرفه من جهه ويدور عذر يتهرب فيه رجع الولد لأبوه وقاله الي صار ,

قال الابو طيب فيه رجال ماهوب صديق لي بس اعرفه شف بيته في المكان الفلاني

رح وخط على جدار البيت بهالعصا واذا طلع قله انا ولد فلان وقدر الله علينا

وذبحنا رجال ونبي ندفنه قبل مايصحون الناس لصلاة الفجر , الولد راح وخط على

الجدار طلع الرجال وقاله , الرجال قال اسبقني البس واجيكم شوي الا هو عند

البيت قال وين الي ذبحتوه قال الاب ادخل المذبوح داخل البيت , دخلوه المجلس

وجابوا له الذبيحه ( مفطح ) وقلطوه , الرجال زعل وقال افا يافلان تختبرني قال

القصه ماهي اختبار لك بس السالفه كذا وكذا وعلمه قصة ولده مع ربعه , جاء

اليوم الثاني جو اصدقاء الولد للبيت على العاده يبون يقلطون ويتعشون , طلع

الولد وقاله هالكلام الي صار حكمه يرددونها بعض الشيبان لعيالهم (( صديق

ابوي صديقي ))

ادري الاسلوب لك عليه بس شي عندي ودي اشارككم فيه ...