لاحت بروق المناشي تقادح من بعيد=وارتخى الهوا نسيمه على غرب البلاد
كنها الضيان من فوق يابس الجريد=واظلم الفضا بامزونن كما لون الرماد
واستهلت بالمسا رشتن دلت تزيد=وابتدا النقع الذي عقب ساعتينن جاد
لين صار القاع بالما متل موع الجليد=والشغايا دورجت من مجاذيبن بعاد
رمّها جرف الشعيب بغثاها والزبيد=والتوا مع الفجوج الوسيعات المداد
وانفرش كل السحق وانفجر زبرن صميد=وارتوا العرفج ورمث الشغايا والعراد
واستمر البرق يلسب مع رجوف الرعيد=والمزون المقبله في مواخرها جداد
والدجى غدا ظلامه كما الولدان بعيد=بالنوافير الرفيعه مثل قدح الزناد
زانت الجلسه واطورق مواريد القصيد=واذكر علوم المطر حامدن رب العباد
واحمي الما فيه بن الهراري الفريد=وارد الباشنفر اللي من ذاقه استزاد
والقدوع مجروش الدبس محبوك الضميد=حافه اللي ما كبس من حجفها والنقاد
واستوا فكري مع القاف والبال السعيد=يقطر الما فوق غصن الثمامه والقتاد
والزهور الذاويه فتّحت عقب الرقيد=والطيور ركود باوكارها وقت الهجاد

يوسف الخليفة ( أبو عبد الله )