|
سالفة الي من حبه له غدى ذيب !! طبعاً السالفه مشهورة..لكن حبيت نذكره للي ماسمعه.. هذا ياطويلين البقاء والسلامه رجال هو ومرته مابينهم إلى كل خير، صار بينهم خلاف بسيط، طبيعي أي بيت يصيربه مشكله وماتروح إلا ويعقبه مشكله وهذي الدنيا، لكن الي حصل إن اهل المره والرجل تدخلوا وكبروا المشكلة ووصلوه مواصيل المفروض ماتاصله، وهذي مشكلة تدخل الأهل بمشاكل الزوجين، المفروض المشكلة ماتعدى جدران البيت.. المراد أن أهل المره أخذوا بنتهم، والمسيكين رجله قعدبه، يوم يومين ثلاثه ماقدر يصبر المسكين الرجال ولهٍ على المره، هو يبيه وهي تبيه لكن هذا المكتوب.. الرجال صار يدور حول خيام أهل المره متشفقن لشوفته، آكا اليوم طاحت عينه بعينه ويغمزله ويتنحون عن الخيام وسواليف وضحك الرجال قلبه منفطر على شوفته.. اتفق هو وياه أنه يبي يجي كل ليلة ويعوي عشان تطلعله، ومرت الايام على هالحال، وجا هاك اليوم الي رجعتبه المره لخيام أهله واثره حامل ويوم دروا الاهل انهبلوا، ايييه وقامت الارض وما قعدت وشلون يبي يستقبلون هالفضيحة بين العرب وأنهم ماحشموا مرة الرجال، طبعن المره هذا رجله والي بينهم حلال، والله ويجيك أخو المره ويهدده بالقتل وقالتله السالفة كاملة وأن هذا رجله وأنه هو الي يعوي كل ليلة عشان أطلع.. هدده أخوه أن صار كلامه موب صحيح بالذبح، والله ويقوم يبي يتآكد، وينحر خيام أهل رجل أخته، ولا به ضيوف عنده والله ويتنكر ويدخل بينهم، والعالم تسولف وقصايد والله ويجيك الرجال وياخذ الربابه ويقوله بيتين.. يقول أخو المره: ياذيب يالي تـالي الليل عويـت *** ثلاث عويات صليلات وصلاب أبنشدك ياذيب ويش أنت سويت*** يوم الثريا راوست والقمر غاب يوم قالهن الرجال درى الزوج أنه انكشف وأن هالرجل من أهل المرة، وعشان مايفهم الموضوع بالغلط لازم يرد، ويرد عليه يقول الزوج: أنا اشهد أني عقب جوعي تعشيت***واخذت شاة الذيب من بين الأطناب على النقا ولا الـردى ما تـهـقويت*** ردوا حلالي يا عريبين الأنساب :p ايييه والله ويسفهل أخو المرة.. ويهج كشرته مترين :D ويرجعون البنت لرجله وانتشرت القصة بين العرب.. الله الله بالردود.. واعذرون إذا الأسلوب ممل، لكن وش تزينون مردكم تحملون :) |
| الساعة الآن 09:03 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir