منتدى استراحات زايد - طلب معلومات ومساعدة في احسن انواع القصبات الخاصة بالبوت

السلام عليكم ورحمة الله وبركاته ،،

اخواني الكرام .. قبل فترة طلعنا في رحلة بوت ( جلب ) والحقيقة انا ماني خبر جلب اساساً .. انا غواص هاوي فقط واحيانا اصيد بالمسدس البحري واحيانا تصوير .. يعني الصيد خاصة صيد السمك في المرتبة الثانيه .. المهم طلعنا رحلة بوت واثناء الرحلة فاجأني احد الزملاء بسؤال بصراحة عجزت عن اجابه الا في حدود المعقول .. وكان السؤال :

ليش ما استخدم قصبات واصيد احسن من الجلب اليدوي .. ؟ شكله تعب من السحب ......
وايش احسن انواع المكائن والخيوط الخ ....

بالطبع انا اجبته على قدر فهمي ومعلوماتي ....
قلت له يا سيدي .. الجلب قبل ما يكون صيد هو في الأساس هوايه وفن ومتعه .. فيه ناس كنت اطلع معاهم جلب قبل عشرين سنه وكانت منطقة الكورنيش بجده الشمالي ( جهة عطاالله والأماكن المجاوره ) كان بصراحة مناطق حلوه للجلب خصوصا كنا نستخدم مكائن قديمه الصنع وقويه اتذكرها كوريه او تايون في ذلك الوقت وكان الصيد حلو وممتع .. اما الجلب عن طريق التسقيط بالبوت فله طعم خاص او آخر .. وانا شخصيا قلت له ما احب استخدم المكائن او القصبات من على البوت .. وفيه ناس تستخدمه .. وفيه ناس تستخدم القصبات من على الكساره زي ما كنا زمان نسويها عند القطان او في الشعيبه ..

صاحبي ما اقتنع من كلامي الطويل .. فقلت له في النهايه .. اسمع انا غواص يعني ما لي في الجلب وخلافه .. وصاحبنا مصمم على شراء مكينه وقصبه ويحب يستخدمها من البوت ..

السؤال : ايش احسن انواع القصبات الموجودة في السوق خصوصا لإستخدامها من على البوت ؟
انواع المكائن المضله او الجيده ؟
مقاسات الخيوط التي تركب على المكينه . هل ينفع 90 او اقل او اكثر ؟

انا الان جالس ابحث لصاحبنا الإجابات الوافيه عن استخدام القصبات من على البوت .. ومنتظر رأي الخبراء والزملاء في افادة اخونا وصاحبنا .. يعني ما احب انكم تقصرون معنا في طلب المعرفه .

اكرر شكري لكم .