ليت الزمان يدور والليل جاري=وانشوف شيطان البلاوي مهذري
جانا لهيب القيظ وقت الذواري=ما باقي باسهول المنافيد بذري
تقاصرت نوهات بعض الصحاري=لكن قدوم الصيد تلقاه يغري
ارخيت عزم الجيب باظلال داري=واعيدها الذكرى والافكار تسري
صيد الجزيره ما له اليوم طاري=ما باقي الا باطرف الدوح قمري
وانشوف باغصون الطلاح الصباري=والدخل المقلول باشجار عبري
وين الارانب داهلات المذاري=واعيون سرحان بوضا النور حمري
وين البدون اللي بروس العساري=وين بمساريح الطويلات عفري
والدور قادم لامهات العكاري=مسربلات البيض واخلوب صفري
جاها صليف الموت والكل داري=لها على وقت الضحى الشوف سبري
جتها الخراريز التشيك القشاري=ما سالمن ضبن توارا بجحري
لو الجدا الوجبه فلا نيب زاري=والا عليها الخمس مع زود عشري
لكنها عشره وعشره تباري=معها ثلاثين وثلاثين كثري
حوافظن تملا ومعها الصفاري=وشلون ما نبغا الملا اليوم تزري
مير اعتدال الحال بين المساري=فيه التوازن وانشدوا عنه خبري