منتدى استراحات زايد - ناس يحطون روحهم بمواقف بايخة، والنتيجة !؟

سلامٌ من الله عليكم

الأحد أول يوم دوام، وكعادتي ليلة الأحد أتوجه للحلاق عشان أروح الشغل مرتب :shifty: فتوجهت ليلة الأحد إلى المحرق لشراء بعض الحاجات الضرورية للمنزل، بعد ما أخذت الأغراض جفت حلاق شكله نظيف وحلو وماعليه زحمة قلت فرصة أنزل أحلق قبل ما أروح البيت

نزلت واستلمني الهندي بالحلاقة العدلة، أثناء الحلاقة دخل شخص ومعاه رجال كبير واثنينهم قعدوا يحلقون، الشخص أعتقد عمره في نهاية العشرين، الشخص سأل الهندي المسؤول سؤال جوهري .. قال له ليش مافي كستمر واجد اليوم !!؟؟؟

الهندي رد عليه: في تحاريم وعزاء واجد نفر يروح ماتم

فدارت بينهم هالمحادثة:

الشاب: الله يحرقهم كلهم

الهندي: لالا مو زين كل نفر هذا مسلم كل واحد حر

استعجبت من رد الهندي، رده كان خطير جداً وممتاز

الشاب: لالا هذي كل بحراني مافي زين، الله يحرقهم كلهم

بصراحة ما قدرت أتمالك نفسي عقب هالكلمة، بدون إحساس ارتفع صوتي وقلت له: إحترم نفسك يا أخ والبحارنه تاج على راسك، وأتشرف إني بحراني وأصل في هالبلد، وأتشرف إني تربيت في الماتم.

طبعا هو استغرب وصار وجهه علامة إستفاهم وتعجب، وكان خايف جداً من ردة فعلي، فرد علي : لالا ياخوي مسامحة مو قصدي شي آنه بس جذي أمزح

ما رديت عليه، خلصت حلاقة ومشيت

أتوقع حط روحه في موقف ما ينساه طول عمره، ففعلاً بالنسبة له كان موقف محرج :lool2:

ويش رايكم يا جماعة هل تصرفي صح لو كان السكوت أفضل ؟