منتدى استراحات زايد - تجربتي بعد تحويل قير الفتك من اوتو الى عادي + استفسار

السلام عليكم ورحمة الله وبركاته

اتشرف بانضمامي لمنتدى مكشات وهذي اول مشاركه لي واللي اتمنى اجد التفاعل منكم واستفيد ويمكن احد ناوي يسوي مثلي في قير سيارته ويسأل وانا اجاوبه كيف ووين وكم كلف وووو الخ ويستفيد

الأخوه الكرام القير الأوتو مريح وخصوصاً في المدن المزدحمه مثل الرياض تخليك تشيل فكرة انك تشتري سياره قير عادي من راسك

واضيف الى ذلك قير الفتك التيبترونك واللي اعتبره انا من افضل القيور للسيارات الدفع الرباعي اللي جربتها من حيث الراحه والنشاط وخاصية تحويل القير للعادي وشهادتي فيه مجروحه صرااحه من حيث قوته وتحمله للجور والكرف اللي جاه
وعيوبه اللي كرهتني فيه :
1- عدم وجود عيار
2- زيته خااص وماتحصله الا في الوكاله وترى يجي في سطل :) ازرق كبر سطل البويه عليه طبعت نيسان وكلام ياباني وغير هالزيت انتبه تصبه في موترك واللتر سعره 80 ريال والحسابه بتحسب

( واللي يقهر :mad: احتكار الوكيل للزيت والعيار بعد عشان كل 40 الف تروح لهم ويلهفون منك مبلغ وقدرهـ ووومالك الا الصبر وش وداك له )
3- كتاوت القير
4- مبرد زيت القير ومشاكله ويمكن يتسبب في تخبيط القير
5- الهزهـ او الرجفه اللي عند الوقوف واللي مالها حل

و اللي خلاني اتهور زياده واحوله لكثرة طلعاتي للبر خاصه ان القير اللي كان عندي متهالك ( على وشك يطلب توضيب )
وما اقدر ابيع السياره واشتري غيرها لقلة النظيف في سوق المستعمل وخصوصاً الفتك
وبعد ماخبط قيره علطول على التشليح و اتفقت مع واحد منهم عنده خبره في هالأمور وقد شفت لاند محول عنده وشغله مضبوط وتوكلت على الله وقلتله شف شغلك ولبقه جنب فتك موديل 2007 قير عادي وركبت قيره كامل والحذاف والعلبه والظفيره والدعاسات فرامل + كلتش والديكور
وركبها وشغله 100% ماشاء الله عليه والصور قريباً
اما العله هو الدفرنس القديم حق الأوتو واللي كنت ناوي اغيره بواحد حق قير عاادي واللي خلاني اهون كلام الناس اللي تمدح دفرنس التماتيك اذا ركب على العادي والقوه اللي يتوهمونها والعكس صحيح القوه من صالح العادي لكن اللي يميز دفرنس الأوتو هو اريح للمكينه لدرجة اني امشي 160 وعداد ال RPM على 3 هذا اللي اعجبني وقوة الموتر 1 و 2 و 3 :good: طرررب بس من يوم تعشقه رابع يخورها العزم واذا عشقت خامس يمووووت لدرجة اني راقي القديه شاد العزم من البدايه امشي حول 170 ويبرد عزمه لين وصل 100 كني قاعد اسوق هايلكس ديزل وانا عامد ما ارده رابع عشان اقارنه بفتك حق واحد من الربع
وسيارته فتك قير عادي ماشاء الله عليه ارقابه القديه وهو بالخامس على 160 ولا ينزل عنها أاابد ماشاء الله عليه الله لايضره

الزبدهـ سيارتي وسيارته طبعاً كلها قير عادي واللي يختلف فقط الدفرنس والفرق بعداد ال RPM على سرعة 120
سيارتي = 2,2
سيارة خويي = 3,5

والمقاوم الفزه يفز قبلي الى تقريباً سرعة 40ثم اروووح عليه بفرق كبير في البدايه ثم يقرب اذا عشقت خامس بس مايروح علي ابد

الأستفسار :
وش الحل للعزم لأني راعي تطعيس ومراقى والعزم اهم من السرعه عندي لأهل الخبره او اللي مجربين

هل فيه حل غير تغيير الدفرنس ؟

واذا فيه اضافات للتزويد غير الهدرز والفلتر تفرق بالعزم يليت تفيدوني .

تحياتي للجميع واعذرونا على الاطاله