آقفى البراد وحل وقت المعاصير=وقامت سموم القيض قلبي تلوفه
القيض مايبهج قلوب الصقاقير=يضيق صدر اللي نوى بالنكوفه
ثنتين لي فيها معزه وتقدير=ودايم لها كبد المولع لهوفه
الأوله ياذيب هي نقلة الطير=لظفت سراويل النداوي كفوفه
من فوق وكره كن ماحط به سير=وكله عجب بعيون ناس(ن) تشوفه
له نظرة(ن) فاقت جميع التعابير=نظرة شجاع(ن) شاف خلة صفوفه
الراس كاشف ابيض الصدر ماغير=مثل السحاب اللي ترازم قنوفه
عريض صدر والكراع افجح قصير=عدل المناكب نادرات(ن) وصوفه
طرح الشبك بأول دخول المعابير=بجبال فارس ماكره ومعروفه
طلاع لحاق(ن) لشرد المعاشير=الشارده ما يمكن انها تطوفه
لوما وراها ماتفيد المسابير=يلحق يتنكس ماتصعب ظروفه
من مثل فعله ما ظرا بالمخاسير=عزام جزام(ن) حداد(ن) سيوفه
اتعب على مثله وسوق الدنانير=وروحي على حبه تراها شغوفه
فعله ينومسني قدٌام المناعير=اغليه ومن شين الصواديف اروفه
والثانيه ياذيب ذود(ن) مغاتير=لا سمعت الهوبال جاتك شعوفه
نتبع هوا وضح البكار المصاغير=ونرعى بها قفر الفياض المخوفه
هذا هواي اللي تمنيته يصير=من قبل تلحقنا الليالي حسوفه