|
شعـر رثاء الأمير خالد الفيصل لأبيه الملك فيصل بن عبدالعزيز رحمه الله السلام عليكم ورحمة الله وبركاته هاذي اول مشاركة لي في منتديات اقلاع سوفت.. فيديو من تصميمي للملك فيصل(رحمه الله) وهي قصيدة بعنوان (لاهنت) للأمير خالد الفيصل مرثيه لأبيه الراحل الملك فيصل رحمه الله لا هنت يا راس الرجاجيل لا هنت لا هان راسٍ في ثرى العود مدفون و الله ما حطّك بالقبر لكن آمنت باللي جعل دفن المسلمين مسنون منزلك يا عز الشرف لو تمكّنت فوق النجوم اللي تعلّت على الكون سكنت دار المجد يا شيخ و اسكنت شعبك معك في منزل العز ممنون صنت العهد يا وافي العهد ما خنت علمتهم وشلون الأشراف يوفون كم ظالمٍ عاداك و اعفيت و احسنت و اخلفت ظن جموع ناسٍ يظنون شلت الأمانه حافظٍ ما تهاونت شفنا بك رجالٍ على النفس يقوون ياللي طلبه الملك بالحب زيّنت عرشك بتاج قلوب شعب ٍ يحبون لوّنت تاج الملك ما قد تلوّنت ما غرتك دنياك ماصرت مفتون بالزهد و المعروف و الصبر كوّنت منهاج فيصل منهج اللي يعدلون تلفتت روس المخاليق وين انت وين العظيم و عوّد الشوف مطعون كم خافقٍ وقّف عقب ما تكفّنت و كم ناظرٍ ذوّب سواداه محزون لو شفت حال الناس عقبك تبيّنت مقدار حب الناس للي يودّون مما بقلبي قلت يا بوي لاهنت و الا انت فوق القول مهما يقولون ................ رابط الفيديو على اليوتيوب ................ اتمنى ان تكون مشاركتي حازة على رضاكم وسلامتكم... |
| الساعة الآن 08:33 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir