على سواد الليل يقظات الاحلام=والا الحقايق في مدى البال تومي
واقع فريد يعادل الفين الاوهام=طيرن تشيله يسوا جولن يحومي
لا تلتفت للفايت انظر لقدام=من شان تسلم من شريط الحلومي
لو نعلم المقبل كما مقفي العام=كان استرحنا من جديد الهمومي
بعض الفعايل كنها سيف الاعدام=والا بعضها مثل خيط الهدومي
من يمشي الجنبه على سبت الاقدام=والا على القطب بمسيل الرضومي
تسلم حسوسه من كواليح الاضيام=ما يرتخي ساقه بحوش الرخومي
افنا بنا الدهر الليالي والايام=واسنين راحت بيننا ما تدومي
ذرعنا من بعض الصواديف هندام=لعلها للمقبلات الرثومي
ما ينحسب جور العداوه بالارقام=لكن يقاس بواقعات الخصومي
رفيقك اللي صار باحماك مرسام=والا الذواري جودها بالحزومي
من غاص غبات المحيطات جزّام=جاب الغنيمه حازها بالسلومي
ترا النجاة اليوم في ترك الاثام=ما قيل زرّاع الزهر حاش ثومي
سلعة مريح البال ترغب وتنسام=تلقا لها سبعين ذربن يسومي
ما ترعى ضبعه في مجاثيم الارام=والبوم ما يلمس بروق الغيومي
والطير يسكن في شواهيق الاعلام=يهفي من الماكر سواة السهومي
واعرف ترا الدنيا لها قيد واحزام=والناجي اللي عن هواها يشومي