ما عاد بالدنيا من الملح ذرّه=الا يا كود الدين واكتاب الاذكار
والمرهي مقفي هقوته ما تسرّه=يمضي على العوجا للاشواك بذار
ترا ضعيف الخير ما به مبرّه=ما ثار في حمله وهو يسمع انذار
كثرت خروقه يكفي الله شرّه=ما كنه الا طير الاخشاب نقار
ما يظلم الجبار قدر الازرّه=يعلم خفايانا على السر واجهار
سامع دبيب النمل ساعة ممرّه=حتى الحيايا في براخيص الاقفار
يجود بالزود الغني ما يضرّه=وهو على العرش استوا الحي جبار
رب السماوات العلا والمجرّه=ما تدركه كل الخلايق بالابصار
ما تاخذه غفوه ولو ربع مرّه=العالي اللي عالم بكل الاقطار
نرجيك ربي عيشتن مستقرّه=بين الجنان اللي بها الحور وانهار
حياة الاخرى بالزمن مستمرّه=والدنيا ما فيها على الدوم سيار
مريت نابي بين رملن وحرّه=ولقيت طلحه باينه دونها اشجار
ما فيها غير رسوم ماطاة هرّه=وخفارة الجرذي على جرف الاحجار
طرا زمان الصيد مخلي مقرّه=ايام راحت ما بقى غير تذكار
وين البدن بين العوالي مفره=وين الغزال اللي خلت منه الاغوار
وين الارانب ما لها اليوم جرّه=صارت صحارينا مداهير واغبار
نحمد كريمن زاد بحره وبرّه=ولا نقص من ملكه الحي مقدار