|
بلا بطارية ثانية بلاهم - بديل بأرخص الاسعار / / فهد العاصمي السلام عليكم ورحمة الله وبركاته كيف حالكم يارجال حيالله كلن باسمه هذه اول تجربه لي مع انها بسيطه لكن القادم افضل واقوى بإذن الله طبعا بداية الفكرة - اني فكرت في تركيب بطارية ثانيه وتوصيلات الكهرب كامله .. ويوم شفت الاسعار ترددت لأن الميزانية ماتساعد والوقت ضيق حيث اني خلصت الاختبارات الثلاثاء مع الطلاب والاربعاء متواعد مع رجال شرواكم بنكشت لمدة اسبوع شفت الاشياء اللي احتاجها ويبيلها كهرب لقيتها بسيطة ماتحتاج لبطارية ثانيه .. لمبات - شحن بطاريات كميرا وفلاشات . . شحن جولات اشياء بسيطه .. موتري بين المرتبتين الامامية فيه تكاية فتك كبيره والموتر ربع فصاير فيه مساحة تحت فاضيه اللي هي بالاساس تكون تكاية الفتك الاسياسية ولا منها اي فايده فقررت استفيد منها بهالطريقة .. الادوات : 1 / لوح خشبي سميك .. مايكلف 20 ريال كنت ناوي تلبيس اللوح جلد يناسب لون التكاية والمراتب لكن لضيق الوقت ماقدرت .. وبسبب اني بعيد تصميمه من جديد لضبط المقاسات بشكل اقوى بسبب غلطه بسيطة وهي قص سانتي واحد من الجهه العلوية وهو بالاساس من الاسفل بحيث تكون طابقة صح 2 / محول كهرب 220 ياباني ب 95 .. 3 / توصيله ب 35 مجربه تتحمل 4 / وصله تحول من طفاية السياره لثلاث فتحات طفاية ب 15 بحيث يشبك المحول في احدها وشاحن الجوال في الثاني والثالث للأحتياط . . أو لأي شي آخر .. طريقة العمل : * تم قياس المكان اللي ابي اسقط فيه اللوح ويكون هو القاعدة الاسياسية * قص اللوح على الشكل اللي ابيه * تثبيت المحول باربع مسامير صغيره باطرافه لكي اضمن عدم التحرك . . * تثبيت لوح خشبي صغير لضمان عدم تحرك التوصيله .. طبعا التوصيله تعمدت اخذت هالنوع لأن سلكها طويل وسميك وعشان لو بغيت انزلها من السياره اقدر والشيء الثاني تتحمل وتمنع الاحتكاك بين التوصيله والمحول كما في الصورة الأخيره النتيجه وهي راكبه على السياره بعد الكشته ..طبعا بعيدها على رواقه وبقيسها صح وبلبسها جلد زي لون التكاية وبضيف اشياء اخرى ان شاء الله .. الإيجابيات : شغل سهل وبسيط وغير مكلف وعملي حيث ان اغلب الوقت كنا نشحن بطاريات الكميرا والجوالات .. وماشاء الله ماتحركت السلبيات : انه من الافضل ان المحول يكون من البطارية على طول بحيث انك تضمن انه لاقدر الله احترقت فيوز أو نفس الطفاية مايتعطل شغل .. طبعا التكلفه : 20+95+15+35 = 165 ريال .. جزاكم الله خير على المرور وأي سؤال او اضافه نستفيد منكم أخوكم : فهد العاصمي |
| الساعة الآن 03:53 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir