ياللي تريد تروح في كل مدهال=ضاري على النوهات عابر سبيلي
المشكله ما هيب بالوقت والمال=المشكله وين الرفيق الصميلي
كم واحدن يسري على واهج اللال=وكم واحدن عند المكيف يقيلي
نوبات وقت الناس تحكمه الاقفال=واحيان يلقون الفراغ المليلي
كم واحدن تلقا له اصحابن قلال=لكنهم مثل السحاب الثقيلي
واحد يعادل بالسنع سبعة رجال=الذيب ما ضره سفوح الطويلي
عايش وحيدن بالرخاوه والامحال=وان صار له ربعن تراهم قليلي
منهو بغا العليا بالاحلام ما نال=ما تدرك الطولات بالمستحيلي
حذرا الطواري في هوا كل قوّال=تمسي على غير العدال وتميلي
مثل النصي راسه بالارياح ميّال=والدوح ثابت بالهوا والنخيلي
دنيا تلاشت بين وافي وحيّال=زمانها كالمرتحل بالظليلي
على رجا الله نمضي بحسن الاعمال=والاستقامه في عدال السبيلي
بعض السوالف للمناعير تنقال=يلقون فيها مقبلات الخليلي
واليا نهجنا بالخلا قور واجبال=نرتاح ما راج بهوانا الغليلي
الذرب والمطنوخ مع طيّب الفال=منهاجهم ما تاه فيه الدليلي
ترا سحاب الخير هملوله زلال=تاتي بروقه مثل قدح الفتيلي
هذي هي الدنيا مراكيد واخلال=والادمي يرجع زمانه ذبيلي