بالليلة الظلما قبل ضوح الاكوان=شبيت ناري ما لوتها الذعاذيع
الجو ساكن والفجر باقي ما بان=واشوف انا السبّع بعادن مشاليع
وحيد باقصى البيد من بين ضلعان=واسامر الهاجس بليا تجازيع
دعيت من فكري عناوين وازمان=وابديت من بين القوافي مقاطيع
توالت نسوم الخفا تقل هتان=وانساحت بروس الحسوس المواضيع
وشميت من ريح الخلا فوح بستان=واشاهد نجوم السما كالشواميع
ما عندي الضوضا ولا كوح شكمان=ما غير ذيبن يدلج بعالي الريع
حولي تنابير الهراري برسلان=من فوق الارطا عالقن فيه توليع
قضيت ليلي بين شاره ونيشان=ودليت اطورق بالبيوت المفاريع
ما ني غرير العاس بالليل سهران=جوابي واضح ما يبي له مراميع
مير السكون بخالي البر لي زان=واشفا الفواد بهيضتن للنجاجيع
يا حلوها وابريق شاهي وقيفان=وامفارق المقرود من دون توديع
بين الصخور بشعبتن فيها حوذان=وادعاع والقريص حول المناقيع
والقحويان اخضر زماليق ريان=من الروي زان بعزاز المرابيع
بان الصباح ولاحت خشوم الامزان=ولا ينقعد فيها بليا مداريع
اما اني القا باللواليح غيران=والا نصيت بلاد ربعي وانا مريع
ولقيت زربن ممرحن فيه سرحان=واثره نفج عني على غير تفزيع
يلقا له لواذه عن السيل ذيبان=ما يشقى جنسه يحتمي بالقراشيع
قضيت يومي والمطر صار شعبان=وابروق الامزان الثقيله مقابيع