|
لكل من يعاني من زحمة الشوارع أو طول المشاوير ادخل وبإذن الله بتدعيلي تجربة لأحد الأخوان أعجبتني ونقلتها لكم يقول أنه قعد يحسب الوقت الي يجلسه يومياُ في السيارة خلال مشاويره ولقى إنه أقل شي ساعة وشاف إنه وقت ضايع بدون فائدة ففكر إنه يستغله. هو يكره شي اسمه قراءة كتب لكن سماع أشرطة ماعنده مشكلة ففكر إنه يحمل من النت مواد سمعية وينزلها بجواله ويسمع عن طريق سماعة الإذن خلال مشاويره للدوام ومشاويره الثانية. بدا بتحميل سيرة الرسول صلى الله عليه وسلم والغزوات الي صارت بعصره وسمعها كاملة بعدين سيرة أبو بكر ثم عمر ابن الخطاب والمعارك اللي صارت بعهدهم مع الفرس والروم. يقول بعض الأحيان أتمنى إن المشوار يطول عشان أكمل سماع بعض الأحداث، بعد كذا سمع تاريخ فلسطين ثم سلسلة أحداث النهاية وهي سلسلة توضح علامات الساعة الصغرى والكبرى واللي يصير بعد قيام الساعة للشيخ محمد حسان، بعدين انتقل لسماع سير وتراجم كثير من السلف وكثير كثير من الدروس والمحاضرات المختلفة. يقول بعد سنة تقريباً ذهلت لما حسبت عدد الساعات الي سمعتها ولقيتها حوالي 300 ساعة، يقول صارت عندي حصيلة ضخمة من المعلومات واستفدت فائدة كبيرة من هذي الساعة الي كانت تروح بدون فائدة. طبعاً أغلب المواد الي يحملها كانت من موقع طريق الإسلام وهو موقع يضم أكبر مكتبة سمعية على الإنترنت على حد علمي . كان يختار المواد الي يسمعها بشكل عشوائي يعني ماكانت له خطة يمشي عليها لكن بعد ماشاف الفائدة الكبيرة الي استفادها فكر انه يحط له منهجية أو خطة يمشي عليها يطلب فيها العلم الشرعي بحيث إنه يبدأ بسماع الدروس الي تشرح الكتب المختصرة بعدين ينتقل للمطولة، فصار يدخل على صفحة الشيخ محمد ابن عثيمين رحمه الله في موقع طريق الإسلام وينزل الدروس الي تشرح الكتب الي يختارها، وسبب اختياره للشيخ ابن عثيمين هو ان الشيخ شرح الكثير من الكتب في مجالات الشريعة، فله شروحات في الكتب الي تتعلق بمجال العقيدة والفقه والحديث والتفسير والعلوم المساعدة مثل علم النحو بالإضافة إلى إن الشيخ يتمتع بغزارة العلم وسهولة الأسلوب فحتى المبتدئ يقدر إنه يفهم دروس الشيخ. الآن هذا الأخ له فترة ماشي على الخطة الي رسمها ونسأل الله انه يتمم عليه بخير. من فوائد الطريقة هذي إن توتر الشخص بيكون أقل في الزحمات وغيرها لأنه فيه شي يسليه وأهم من هذا إنه يؤجر إن شاء الله إذا كانت نيته بسماع القصص وسير السلف الصالح الاقتداء بهم وتحفيز النفس على الطاعة ونيته بسماع الدروس زيادة علمه الشرعي وبالتالي يعبد الله على بصيرة. أسأل الله العظيم أن يعيننا على استغلال أوقاتنا بما ينفعنا في الدنيا والآخرة إنه قريب مجيب الدعاء |
| الساعة الآن 01:01 PM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir