جول القطا فوق ام غلس طار ما شيف=مدري نصا حسلات والا مهافي
ادنيت انا الدربيل واطورق القيف=واهوجس بحالي عساه متكافي
ما نيب ضايق ما عليها تحاسيف=مير انها للي جفاها مقافي
يمكن نسير بموج من دون تجديف=واتزورنا سود الليالي ضعافي
عديت في نابي وادربل على الريف=لعلها تنشاف دون الشعافي
لقيتها ترسم بالانجاد تحذيف=تروج من بين العروق السوافي
مليت بارودي رصاصن معانيف=وادرت سلف الجيب والجو دافي
ونصيت ماقعها دعوبن مجاريف=وختلتها دون المراميث حافي
واثر القطا كدري لنا فيه توصيف=حجم الخضاري واصفر الريش خافي
فريرها عجلن سواة الخواطيف=والا كما بط الغدير الجوافي
مير انها المقسوم والرزق ما عيف=يكفيني جوزن يجعل الزاد وافي
حصيلتي منها على خير تهديف=ثلاث اناثي معها ديك متعافي
وسريت عنها للضلوع المشاريف=من حول عنقورن بروس النيافي
اريد اقيل بحاجره واقري الضيف=واخذت لي شوطن بالاشجار غافي
وصحيت من نومي على صوت ترفيف=حمامتن طارت وراحت خلافي
شبيت نار الرمث وادنيت انا الكيف=وابريق شاهي واطرف الجمر طافي
والحقتها جرم الغضا دون تصفيف=شلايخن فوق المليله تلافي
وصبيت لي فنجال مصفاته الليف=ما جا له حثاله به اللون صافي
وسعيت لاجل الزاد كشنه وتنتيف=والحقتها خضار الوسوم النظافي
يا حلوها كبسة خلا دون تكليف=نثريتن والبال منها متشافي
قضيت قيله والذعيذع قراقيف=في خاليه يومين ما جاها لافي