امس الضحى مريت باجبال سلما=فيها السما سودا تراكم بها الغيم
بدا الضباب وروس الاشهاق غتما=ولا عاد تاضح بالدروب المراديم
بغيت اروح لغار لو كان ظلما=اوقي نفسي بالمذاري عن الضيم
رزقي على الله ما ترك طير يضما=ما ساب سهرن بالوسيعه ولا نيم
كافل سليم العين والداب الاعما=باعث رميم الكاينات المجاثيم
والا النشاما هناك مكثورة اسما=لكنها بعض الظروف المداحيم
شبيت ناري والحطب ناشه الما=دخانها ثاير يحوس المناسيم
نخيت صبري والصبر خير مرما=والهيت نفسي والسخط فيه تاثيم
حسيت بارعوش الدفا والما يحما=والا الخلا سابح تراشق به الديم
وادنيت انا الدربيل والدنيا جهما=وبديت اعاين بالسفوح المقاديم
وابصرت ولبه بالشخانيب هلما=مطعومها ولا من العفري والريم
ما عندها غير الدرابيس جثما=يا كود عجلات الجراذي مخاطيم
والنار صارت تستوي لي وتزما=وقضيت يومي بالكهوف المجاهيم
واشوف شلالن صفق راس خرما=يهفي على سفح الهضاب المزاميم
جوانب جروف المساييل هدما=وروس العوالي صايراتن مرازيم
بدا سريب الما على الغار يجما=كما النزيز اللي ضرب دونه الهيم
ومضيت للموتر لاجل فيه محما=وسريت من بين الصخور الدحاريم
صارت سواليفن بالافواه تسما=والبايرات العوج ما حولها مقيم