خمسين ليله واسود الطير حايم=من شان جيفن صايراتن مجاثيم
تداحمت فوق الولايش لهايم=في راس صمدا ما رشق دعبها الغيم
راح الوسم والسيل ما له علايم=ولا ذكروا حتى من الماطر الديم
تثنّا فيها الرمث وامسى عدايم=والدوح ثاوي غصنها كنه السيم
والذيب عاوي والضواري تلايم=في راس عنقورن صخوره مثاليم
والا الجمل يرغي بليل النسايم=ما يلقى بالمرعى سوا عود برسيم
وتهلست بالقور بعض البهايم=والعين دلا موقها يذرف الضيم
بلادنا صارت غبار وعسايم=قفرا شحيحه والعوالي معاتيم
حتى الشويط امسى رميم وهشايم=تحوسها الارياح بين المزاميم
يرعى بها الجرذي جلود الرخايم=يذوق من عجفات الاشجار تقظيم
يالله راجينك خشوم الغمايم=من لوح قمعن يضوي البر ويهيم
نريد خيرك في طلوع النعايم=قبل وحيف شباط مزنن مداهيم
يجري بها الوادي يشيل الردايم=يزيل من حوله حبوس ومراسيم
يبقى الزبد خمسة عشر يوم عايم=تكثر بها الخلفات وضح ومجاهيم
وان كان يا ربي فعلنا الظلايم=التوبه بعفوك دوا كل تاثيم
منهو لنا غيرك بالاكوان دايم=الواحد المعبود عون المظاليم
رفعنا بيض كفوفنا بالندايم=يا كاشف الضيقان رب المعاديم
سجدنا فوق القاع عقب السمايم=دعينا باتلا الليل والقوقسي نيم
فلا لنا غيرك يزيل النقايم=يا باسط الارزاق من دون تلزيم