مشيت انا لخويش واقروم مكشات=سجينا نوهه في زمان ضحويه
لقينا بالبران كيفن ونفهات=مع شوفة الاجواد لا وا هنيه
هدفنا مجلاس الشغاميم بالذات=والزود تنفيه النفوس بخليه
يوم ارتكينا والربع فوق فرشات=جابوا دلالن حولها السكريه
بغداد والرسلان معها البريقات=وكل واحدن منهم يضاحك خويه
نفوسهم زينه ولا فيها نيات=ما تلقا فيهم واحدن فيه سيه
وصلنا واليا الصيرمي رافع الشات=كرعنها باغصون السلم من عليه
هذاك ابو عزوز طباخ نوهات=شيّال الاحمال البليهي سميه
مع خالدن واحمد تزين المخاوات=شبيبن وفيصل فرحنا بمجيه
وامبارك وراشد فهود الرجالات=وامحمد وعبد الله الصيرميه
باحضور ابو ياسر لفتنا المسرات=وعبد السلام نقول يا ربي حيه
والذيب ابو فيصل رفيق المسافات=والقرم ابو راشد ونفسن نقيه
وابو معاذ اهلين لا شاف ضيقات=اربع طعش ذولا بذيك النحيه
باقدومهم دارت علينا الوناسات=سنايع المسرا وبلعه رخيه
ما شفنا فيهم بالمناجيع سيّات=ولا عرفنا في حداهم رديه
الا صقورن نابذين السفاهات=واقلوبهم بيضا كما النافعيه
يا زين مرباع الخلا كل حزات=مع شارحين الخاطر الشوشليه
لهم على حوف الفايفي هوايات=الصيد والترحال والشاذليه
هذي حلاة الوقت لو كان فوات=والطاف ما نلحق معالم مديه
لكن عسانا بالنهايه لجنات=في عالي الفردوس عقب المنيه
رجانا باللي فوق سبع السماوات=يفوز بالحسنى مطاوع نبيه