موسم الامطار جانا من يبلغنا البشاره=يمكن العساس ينبي عن مقابيلن مطيره
وا عسا الخمسين ليله يضرب البارق شراره=والمزون السود توضي بالسما مثل السعيره
كالعقارب يستنير الكون في قاصي قفاره=تزبر المنشا الركايم والرباب بكل ديره
يرتوي راس العدانه والبرد فوق الزباره=تختفي روس النثايل والمقابيل الغزيره
والجلاميد الصميده ترتخي في كل قاره=والمراهيش الهميله بالحصى توحي خريره
من تماخيض السحايب ينخفس طين الخفاره=يستزيد القاع بالما بالسحق ينساح سيره
والجذيب يزود سيله جارفن باول نهاره=لين فوق القاع الاقصى يبدا بالمجرى هديره
تمسي الوديان كالانهار من فوق السماره=والنفود يصير قاسي والهوا ينسم عبيره
يسقي البيدا البعيده والخلا يذهب غباره=من بلاد عمان لين قيال في غرب الحفيره
والبذاير تنتشر باقصى المشاريف انتثاره=يرتوي زملوق نوار المشاجير الكثيره
والبختري والنفل والشيح بالجو انتشاره=فوحت القيصوم تسري بالهوا ريحه عطيره
تبصر الخبيز نابت بالخلا وابقاع حاره=والزبيدي بالصحاري والبلاد يزود خيره
يستطيب الكيف برا يشعل النجاع ناره=والمعاميل السفيعه والوجوه اللي سفيره
شوفة المرباع زينه ما توفيها العباره=حتى لزهور الفيافي نظرتن واجوال طيره
بالمسا والشمس حيه ما بعد بيّن صفاره=فوق رمث الروض تنهال العصافير الصغيره
تقترب من جلسة النجاع ما فيها استذاره=وام سالم بالضحى والقايله توحي صفيره
تجتمع فيه الحبايب والنزيل يزور جاره=والشواوي ترعى بالادباش واتجاور غديره