راحت بنا الدنيا والايام ضاعت=والعين ما صارت تواري دموعه
تبغا تشوف اللي عليه استطاعت=ما تامن الحزات لو بار بوعه
واشموع بالي بالدواريب ماعت=تنير بالظلما بقايا سطوعه
واصدوفها بين المغاليق فاعت=شالت على البال بقساها مزوعه
واحسوس نفسي ما تراخت وزاعت=مير انها تمسي وتضحي قنوعه
هذي عناصر قصتي حين شاعت=واكمالة التوصيف تاتي تبوعه
ليه اشتكي للوقت وايام تاعت=شكوا على غير الولي بان جوعه
والروح تضمى والتفاكير جاعت=بارادة الرحمن تبني دروعه
واحلام سجات الفتى قيل ذاعت=من هاجسن بين المحاني يلوعه
ما صارت ايامن على الكيف طاعت=والدنيا ما تاتي على كيف طوعه
بامر الولي فوق الزمان استراعت=والا ترا صيورها ما يروعه
لو زانت الدنيا للاجواد صاعت=قيل انها عقرب صليفه لسوعه
نلوذ بالخالق عن كلوف لاعت=ما غيره مجير الفتى في خضوعه
وافكار بالي بالصحاري تداعت=ما شاقها الغابه كثيره جذوعه
اشوفها باطلاح الاقفار ساعت=هذا هواها ما حصدنا زروعه