|
قله : الجمل في عيني صغير السلام عليكم ورحمة الله وبركاته مسيكم بالخير الجميع صارت حادثه في ديرتنا واذكرها زين وكنت بعمر حوالي 9 سنوات في يوم من الايام توجه شاب من ابناء خؤولة شايبتي للبقاله فصدف في البقاله ولد في سن الطفوله من ابناء عمومته الشاب يقول للولد : ابتعد لهناك ودي اخذ علبة حمص يقوم الولد يشتم شايب هالشاب والشاب يصفع ابن عمه ذيك الصفعه ولكنها مو هالصفعه القويه المؤذيه راح الولد لبيته يبكي سآله شايبه : ليش تبكي يبه ؟ قال الولد : ولد عمي فلان صفعني لني شتمت شايبه قاله ابوه : اذن انت غلطان ليش تشتم شايب ولد عمك ما تعرف انه شايب فلان ولد عمي عصر ذاك اليوم جلس جدي وبعض الشيبان رحمهم الله واموات المسلمين قدام بقاله جنب بيت خالي وسولفو بسالفة الولد وابن عمه والامر ما يحتاج لانها سالفه هينه الولد ما عجبه جواب شايبه فصبر لين جا اخوه الكبير وسولف له السالفه هاذ الاخ طبعه عصبي المزاج ومندفع ولا يحسب عواقب الامور فقام اخ الولد يحمل مسدس ويتوجه لبيت ابن عمه شافوه الربع وهو يمشي بسرعه والشرر يتطاير من عيونه والمسدس على خاصرته قاله جدي رحمه الله : وين وين عفلاح الله والمسدس على خصرك ؟ رد عليه المندفع اسمه سالم : ودي اروح اطق ولد عمي لاجل مره ثانيه ما يطق اخوي قاله جدي رحمه الله : يا ولد روح لبيتك وخلي هالحديده اللي معاك بعيده عن ايدين اخوانك رد عليه سالم : ابد لزوم اطق ابن عمي واعلمه درس ما ينساه قاله جدي : يا ولد ما عندي كبير الجمل على كبره بعيني صغيرلا تخليني اتعصب واسوي سواه انت تندم عليها سالم صمم على رايه وفجأه يقوم جدي الشيخ يصفع سالم ذيك الصفعه على وجهه تهيألي الديره كلها سمعت صوتها يتقدم شايب سالم وياخذ المسدس من ابنه سالم ويعطيه لخالي ابو حاتم وقاله : خله عندك يا ابو حاتم شايب سالم يقول لجدي : امسحها فيني يا شيخ زلة اهوج مندفع ويمسك ابنه سالم من ذراعه ويقوله : الشيخ ذيب قالك : روح للبيت ترد عليه مو تعانده ما احد منا يرد كلمة شيخ العشيره وياخذه للبيت جدي قال : لا حول ولا قوه الا بالله العلي العظيم استغفر الله العظيم من كل ذنب عظيم هاذ الباقي علينا شبابنا ما يردون علينا واستأذن من الشيبان راح توضا ورجع جلس مع الشيبان لين صار وقت اذان صلاة المغرب ناظرني جدي رحمه الله وقلي : انت على وضوء يا حمود ؟ قلت : ايه على وضوء توجهنا الجميع للمسجد صلينا المغرب جماعه بعد الصلاه رجعنا للديوان جلست الشيبان وصرت اصب لهم الفنجال بعد فتره بسيطه جا سالم وشايبه دخلو الديوان طرحو السلام ورديناه عليهم سالم جلس قدام جدي وقال : اسف جدي الشيخ ما كان قصدي ارد كلمتك مير كنت متعصب الله يخزي ابليس اللهم امييين اللهم امييين جدي قاله : اسمعني يا ولدي تظن اني كنت مبسوط اني مديت يدي عليك ؟ تعلمو من حنا الشيبان الوضع هين ما هو مستاهل اخوك غلطان وابن عمك غطان وانت غلطان بعد لو فرضنا انك رحت لابن عمك وتهاوشتو وتضاربتو وطلعت طلقه من المسدس وعورت ابن عمك نتخالص مع اولاد عمومتنا طبعا بعد جهد وتعب لكن الحكومه ما عندها تفاهم بهاذ الامر في تحقيق وسجن وبهدله ناهيك عن تعب شايبك في هالامر ودها محامي وترافع وسالفه طويله يبه المثل يقول : الغضب اوله جنون واخره ندم سالم امسك بيد جدي ويحب عليها وجدي رحمه الله يسحبها ويقوله الله يرضى عليك الله يرضى عليك بعد ما تعشو الربع وكل واحد توجه لبيته رحنا للبيت جلست جنب جدي رحمه الله فقالي : يبه يا حمود اياك ثم اياك انك تمد يدك على انسان ولا تنطق بكلمه قبل لا توزنها ما في يوم سمعت رجال من الديره قال لجدي لا يا شيخ او رد كلمته الا سالم لكنه جاه الرد على سواته الحين سالم بلغ من العمر حوالي 70 سنه ولا زال حي يرزق لكن اغلب اهل الديره نسو هاذ السالفه وما عاد احد يذكرها مضى عليها ما يزيد عن 35 سنه امس كنت مع صديقي ابو مرزوق عند الشياه والنعاج قالي : المره الوحيده اللي سمعت فيها شخص قال لا لجدك الشيخ ذيب شايبي رحمها الله واموات المسلمين هاذ الكلام على ما اذكر كان في صيف سنة 1967 من القرن الماضي حيث انه جدك وشايبك رحمهما الله ودهم يعزبون بالشياه واالنعاج في ام قرن شايبي رحمه الله قال لجدك : لا شيخ ذيب ام قرن بعيده كثييير عن الديره وعشبها ماهو بالكثييير نعزب في الطوال عشبها ما شاء الله وقريبه من الديره حاليا ابو مرزوق بلغ من العمر حوالي 76 سنه ولا يزال يتمتع بصحه جيده وترك رعي الاغنام لكن يتردد على الحلال بصفه يوميه يتفقد الاغنام ويرجع لبيته وسلامتكم يالربع |
| الساعة الآن 01:15 PM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir