|
كل عقده ولها حلال السلام عليكم ورحمة الله وبركاته مسيكم بالخير الجميع قبل حوالي 10 ايام حصلت مشكله بالديره ابتدت بين مجموعه من اولاد بسن حوالي 14 او 15 سنه ( مراهقين ) انتقلت للشباب وكبرت وتطورت وعصفت بالديره استخدم فيها الحجاره والعصي وسمع دوي رصاص في الديره قدام بيت خالي ابو حاتم كانت مضاربه وهوشه وحنا نفزع بين الشباب تساقط علينا حجاره اصيب خالي بحجر في راسه وصار ينزف الشباب انحاشت ادخلنا خالي للبيت واستدعينا طبيب الديره الطبيب احمد جا لبيت خالي وقطب الجرح 4 قطبات محدثكم ابو ضاري اصابه حجر بكتفه اليمين وحجر بجبينه اليمين كانت الشيبان تبذل مساعي حميده لين سيطرت على الوضع صممنا نعرف من اللي ضرب خالي بالحجر في راسه وحيث اني خدمت بالشرطه بديت استفسر واسأل وساعدني اولاد خالتي ( امي بالرضاعه ) تعرفنا على اللي ضرب خالي بالحجر وحين عرف هاذ الشخص انا عرفناه دخل بوجه ابو مرزوق صديق خالي جا ابو مرزوق لبيت خالي جلس وصبيت له الفنجال قال ابو مرزوق : يا خوي ابو حاتم الولد مصلح واهله بوجهي حقك تاخذه بالصاع الوافي وادري انك وربعك ما تقطعون وجهي رد عليه خالي : ابشر يا خوي ما احد يقطع وجهك ما عمرها حصلت بديرتنا قبلت وجهك ودخالتك وكفيلي ابو سلمان اكبر شيبان عشيرتي بالسن والمقام ابو مرزوق راح لربع الولد مصلح وابلغهم اني خالي قبل دخالتهم عليه وهو كفيلهم بالحق اللي يطلبه خالي مسا ذاك اليوم لفت جاهه لبيت خالي ابو حاتم يتقدمهم ابو مرزوق استقبلهم خالي ورجاجيل العائله والعشيره وجلسو بالديوان قام ابو مرزوق وقال : صلوا على رسول الله اللهم صلي على سيدنا محمد يا خوي ابو حاتم جتك الجاهه الكريمه من شيوخ وشيبان عشيرتي لاجل ننهي المشكله اللي حصل حصل ما في مجال نرجع الوقت كانت زلة ولد جاهل ما هي مقصوده حنا ما نبرر سواة مصلح ولا نعطيه عذر مير كانت زلة و ما احد يتجرأ ويسويها لو درينا احد وده يسويها يده نقطعها انت شيخ الديره وكبيرها الحين ويش ودك وحياك الله حقك تاخذه بالصاع الوافي وقف خالي وبسمل وقال : يا خوي ابو مرزوق حياك الله انت والجاهه الكريمه كلنا عمام وخوال عيالي وعيال اخوتي وخواتي لو امسكو مصلح ما رحموه لكني منعتهم الامور ما تنحل بهاذ الشكل تزيد الطين بله ونعقدها ما نحلها وتصير الضغائن والحقد والكره بالقلوب عندنا سلوم نمشي عليها مطالبي ودي بياض وجه وغز رايه بيضا على بيتي واعتذار من ربع مصلح قدام اهل الديره ومصلح يجلي عن الديره فتره لاول يوم في شهر رمضان المبارك لاجل تهدا النفوس 12 شخص تصاوبو يتكفل مصلح وربعه بمصاريفهم الطبيه يظل اصابة ولدي ( ابن اختي ) ابو ضاري تصاوب بكتفه وجبينه ودك شي يا ابو ضاري وقفت وبسملت وقلت : سامحته دنيا وآخره ما ودي شي لوجه الله تعالى الربع قالو : يا ابو حاتم ابشر نبيض لك وجهك ونغز لك رايه بيضا ومصلح يجلي عن الديره وانت يا ابو ضاري بيض الله وجهك ما قصرت ابو مرزوق قال : اشهد لك يا ابو ضاري تربيت على الطيب والشهامه والمرؤه والرجوله وانت يا ابو حاتم ربيت رجاجيل يسدون يوم الملمات ثاني يوم مصلح بيض وجه خالي بالديره والطريقه يحمل عصا طويله عليها قطعة قماش بيضا يرفعها ويطوف بيها الديره ويقول بيض الله وجهك الشيخ ابو حاتم يرافقه بعض الشيبان لين يطوف الديره كلها وغزو على بيت خالي ابو حاتم قطعة قماش بيضا مربوطه بعصا طويله شايب مصلح تعذر لخالي قدام اهل الديره ابو مرزوق تقدم وقال : يا خوي ابو حاتم وصلك حقك وافي غير منقوص؟ خالي رد عليه : بيض الله وجهك ما قصرت وصلني حقي كفو كفو يا ابومرزوق اعرفك انت على قدر المسؤوليه وما هي بغريبه عليك ربع مصلح طلبو من خالي مهله 4 ايام لين مصلح يرتب اموره وخالي وافق بشرط ما يمر مصلح من قدام بيت خالي الا اذا اقتضت الامور ويكون مروره سريع في اليوم الثالث من المهله الرجاجيل مجتمعين في الديوان اذا سيارات الشرطه تتوقف قدام بيت خالي كانت 6 سيارات يدعمها 70 جندي من قوات الدرك اجتمع خالي مع الضباط وابلغوه انهم ودهم يفتشون على الاسلحه الغير مرخصه بعد التفتيش ما لاقو اي سلاح غير مرخص جلسو في الديوان قال الضابط : يا ابو حاتم وصلنا خبر انها حصلت هوشه كبيره في الديره وتصاوبت ومعاك 12 شخص ليش ما بلغت ولا اشتكيت ؟ رد عليه خالي : حلينا الهوشه بالتفاهم وبالود والتراضي ما احتاج الامر للتدخل من قبل قوات الامن ما هو بقصور منهم لا والله لكن مثل ما قلت لك ناظرني الضابط وقلي : وانت يا ابو ضاري ما ودك تشتكي ؟ قلت : لا يا حضرة الضابط تصافيت مع الي صوبني وما كان الامر مقصود حصلت بالغلط والحمدلله انتهت على خير بعد 4 ايام مصلح جلى عن ىالديره ويرجع للديره في اول يوم من شهر رمضان الكريم للحين الامور في الديره الحمدلله ما يعكر صفوها شي حين تصاوب خالي ووصل الخبر للربع فزعو خوالي وخالاتي ورجاجيل العائله بيت خالي غص بالرجاجيل الشباب صارو يتوعدو انهم ودهم يقتصون من اللي صاوب خالي لكن خالي قال : اسمعو ما ودي اسمع هالكلام كل عقده لها حلال اي واحد فيكم يقدم على سواه احاسبه عليها لا تزيدون الطين بله نحل الامور الرويه والعقل تعلمو منا حنا الشيبان ومثل ما ذكرت بالسالفه انحلت الامور بالعقل والمنطق والرويه وحكمة الشيبان بخبرتهم وتجاربهم اللي مرت عليهم وسلامتكم يالربع |
| الساعة الآن 03:43 PM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir