|
شايبتي والعقرب الاسود السلام عليكم ورحمة الله وبركاته صبحكم الله بالخير الجميع شايبتي رحمها الله واموات المسلمين تعودت انها تصحى عند آذان الفجر تصلي وحين يطلع النهار تشتغل شغل البيت تنظفه وتطبخ وتجلس وكنت وشايبتي لحالنا خواتي الثنتين الاكبر مني متزوجات وهاذ ما كان يمنع اختي تجي البيت تتفقد شايبتي اذا تحتاج شي اخواتي تزوجن من اولاد خالي الكبير اذكر في يوم وكنت بسن حوالي 15 سنه شفت شايبتي تنظف حوش البيت ساعدتها ونظفت طرف حديقة البيت وسويته بمشط الارض شايبتي جابت فاس صغيره وصارت تسوي حفر صغيره بين كل حفره واختها تقيس مسافه بيدها حوالي 20 او 30 سنتمتر حين خلصت دخلت البيت وطلعت كانت تحمل صندوق فلين داخله شتلات طماطم بديت وشايبتي نزرع الشتلات لين خلصنا كان الوقت صار الظهر مرت لحظات سمعت آذان الظهر تنظفت وبدلت هدومي وتوجهت للمسجد وصليت الظهر جماعه مع الموجودين في المسجد ورجعت للبيت عصر ذاك اليوم زارنا خالي ابو حاتم وزوجته قريب وقت المغرب قالت شايبتي : يمه يا حمود انتبه وانت تمشي في حوش البيت لني شفت عقرب مدري وين تخبى تحت اي حجر الله اعلم قلت : توكلي على الله ونعم بالله مر حوالي 4 ايام في مسا يوم بعد المغرب جت هبات قويه من زوابع الهوا اثارت التراب في الديره حين طلع النهار شفت حوش البيت من الشباك كان يغطيه اوراق الشجر واكياس نايلون مدري من جت هالاكياس طلعت من البيت مع شايبتي رحمها الله واموات المسلمين بديت اجمع اوراق الشجر اللي على الارض بمشط الارض وجمعت اكياس النايلون وحطيتها داخل كيس كبير كان باقي على الارض كيس نايلون لاحظت عقرب لونه اسود لكنه مو كبير ما لحقت احذر شايبتي كان لدغها في يدها اليسرى جانب ابهامها فصرخت ابعدت يدها ودست على العقرب ورميت الكيس من يدي وانطلقت اركض صوب بيت خالي شافتني خالتي ( امي بالرضاعه ) سألتني : ويش فيك يمه تركض ؟ جاوبتها : شايبتي لدغها عقرب بيدها صارت تقول : الله يجيب العواقب سليمه خالتي راحت بسرعه تشوف شايبتي كملت طريقي اركض دخلت حوش بيت خالي وكنت اصارخ يبه يبه يبه طلع خالي من البيت بسرعه وقلي : عسى ما شر يبه ويش فيه تصارخ ؟ كنت التقط انفسي قلت : يبه الحق شايبتي لدغها عقرب بيدها انطلق خالي صوب سيارته شغلها طلعت معاه وانطلق صوب بيتنا وصلنا خلال لحظات كانت شابيتي تبكي من اثر لدغة العقرب ناظرت كانت علبه معدنيه على شباك البيت حطيت العقرب بواسطة غصن داخل العلبه اطلعنا شايبتي وخالتي بالسياره وانطلقنا صوب المستشفى وطول الطريق شايبتي تبكي وخالتي تصبر فيها كانت ازمة الطريق وزحمة السير خالي شاف دورية شرطه توقف وقال لهم : معي حاله طارئه ودي اروح فيها للمشفى يا ليت تفسحولنا الطريق الشرطي قال زين توكل على الله شغل سارينة الشرطه وهو يسوق قدامنا وخالي بسيارته ورا دورية الشرطه لين وصلنا المشفى وانزلنا شايبتي الممرضين جابو سرير اطلعنا شايبتي عليه وادخلوها قسم الطواريء بسرعه سأل الطبيب : ويش صار مع الحرمه قلت له : لدغها عقرب اسود بيدها عند ابهامها وهاذ هو العقرب داخل العلبه الطبيب ناظر العقرب قال : بسرعه حضرو المصل الخاص بلدغات العقارب جلست مع خالي في الانتظار وظلت خالتي مع شايبتي مر حوالي ساعه اذا نشوف رجاجيل العائله وشبابها يسألون خالي عن شايبتي : ان شاء الله سليمه يا ابو حاتم خالي يقول : ان شاء الله خير الله يجيب العواقب سليمه جا الطبيب وقال لخالي : الحمدلله حرمتك بخير عطيناها المصل لكن لزوم تظل حت المراقبه مدة ساعتين او 3 ساعات خالي قال للطبيب : هاذ اختي ماهي حرمتي . الطبيب تعذر لخالي وخالي قال حصل خير وحين سأل كم كلفة المصل قالو : المصل مجاني ما تدفعون ثمنه مع مرور الوقت وحنا في المشفى جت خالتي ام متعب وبعض حريم العائله الكبيرات في السن وخاصه عمتي ام صالح رحمها الله واموات المسلمين الطبيب قال لخالي : ما في داعي لوجود كل هالعدد من الرجاجيل والحريم في المشفى حالة اختك الحمدلله ما فيها شئ الحين تقدر تروح للبيت وسلامتها خالي قال للطبيب : ذول ربعي اخزاني اولاد خوالي واولاد عمامي ما اقدر امنعهم يتطمون على اختي الطبيب عطا خالي روشته طبيه فيها ادويه لشايبتي رحمها الله واموات المسلمين رحنا للصيدليه نشتري الادويه تفاجأت كانت عباره عن 4 حبات 2 منهم ملونه و 2 لونهم ابيض المهم رجعنا للديره وخالي اخذ شايبتي على بيته وقال لخالاتي : ام حمود تظل في بيتي زين ما ودي كلام واعتراض ظلت شايبتي 3 ايام في بيت خالي لاحظت مكان اللدغه كانت متورمه ولونها احمر خالتي قالت لشايبتي : انتي ما شفتي العقرب حين مديتي يدك ؟ قلت : يمه ما لحقت اقول لها العقرب كان لدغها قالت لي شايبتي : شفت يمه قلت لك في عقرب مدري وين تخبى تحت اي حجر الله اعلم 3 ايام وشايبتي رحمها الله واموات المسلمين وهي تشعر بشي يسري مكان لدغة العقرب والحمدلله بعد ذاك اليوم ما شفنا اي عقرب في حوش البيت جمعت ربعي واولاد خوالي واولاد خالاتي وقمنا بخلع كل الاحجار اللي في حوش البيت باستثناء 5 احجار ضخمه تحتاج جرافه او بلدوزر يقيمها من مكانها الاحجار اللي قمناها سويناها سلسله حجريه بين حديقة بيتي وحديقة جاري ابو طالب طول هالسلسه الحجريه 2 متر وارتفاعها حوالي 30 سنتمتر الاسبوع الماضي يوم الاثنين لاحظت ثعبان في حديقة البيت وكان عندي صديقي ابو مرزوق فامسكه وقالي هاذ ثعبان غير سام حطه في علبه واخذه معاه واطلقه في مكان بعيد عن الديره وسلامتكم يالربع وما تشوفون شر إن شاء الله |
| الساعة الآن 08:10 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir