منتدى استراحات زايد - الشاعــر الكبــير عبدالله بن عون

ياطيـر عقبـي كـن خاطـرك شـايـن -- خاطرك شين وغيبتـي عنـك يوميـن ؟

النقـص فيـك مبـيـنٍ لــه بـوايـن- - في لمعـة الريشـه وفـي ناظـر العيـن

ياطيـر انــا ويــاك كـنّـا خـدايـن - - وبينـي وبينـك ولـف ومعامـلٍ زيــن

يـوم نتخـاوى مـع وجيـه الضعـايـن-- ونهمل سبوقك في مناكـب ( خسيريـن )

ولاّ ( شمـال الهضبتـيـن القـرايـن )-- شرقي ( طلال) .. ومن ( سواحيق) ويمين

ولإ عطيـنـا سـكّـة ( التـابـلايـن )-- ولاقـد عطيناهـا عليـهـن حـراذيـن

نصبـح علـى طـارات شهـب المكايـن-- بيـن ( العراقييـن ) و ( الأردنيـيـن )

فـي خايـعٍ بـه كـنّ عينـي تعـايـن-- ربد الحباري بـه علـى أربـع وثنتيـن

ونأخـذ لنـا أيــامٍ بـذيـك الدفـايـن-- مابيـن برقـع والـغـدف والبسيتـيـن

ونكسـر علـى ماينحـدر مـن ضوايـن-- وناخـذ هنـاك أسبـوع والاّ سبوعـيـن

وننكـف نشـاط وسالميـن الصخـايـن-- ولـوّ كـان نتعـب عدنّـا مستريحـيـن

قــدّام يطـلـع للصـقـاره زبـايــن-- نـاسٍ تحـوش القوبعـه بـأم روحيـن

ليـا روحــوا بمشحـنـات الخـزايـن-- مـافـي نحـاهـم ذوّقــوه الأمـريـن

والـيـوم مابيـنـي وبيـنـك مـدايـن-- أنا سعودي وأنـت جـايٍ مـن الصيـن

وأمّــا لقيـنـا للحـبـاري عـوايـن-- والاّ تـوادعـنــا وداع المـحـبـيـن

الـوقـت ماتالـيـه معـنـا بـزايــن-- والبرّ في حادور مـن حيـن فـي حيـن

أدنـاه ملـيـانٍ كراتـيـن ( فـايـن )-- وأقصاه ضاق وضيّقوا بـه هـل الضيـن

وضاقـت مناهـج طيبـيـن الضغـايـن-- اللّي علـى المقنـاص بالطيـر ضاريـن

واليـوم كـان اللـي يحاكيـك مـايـن-- هـذي سبوقـك وأنتهـض بالجناحـيـن

وهاجـر مهاجـر مبحـرات السفـايـن-- للصين والاّ أهبـط علـى ضلـع قزويـن

لـو كـان مـا عنـدي فراقـك بهـايـن-- حنّـا عــزاز ولانهـيـن العزيـزيـن

خلّـك تــروح ولاتـشـوف الغبـايـن-- شاملـك عفـوٍ مثـل عفـو المساجيـن

الشاعر : عبدالله بن نايف بن عون الرويس العتيبي
منقــول