استشارة في تركيب فرارات للدبل ولمبة الدبل بالطبلون لاندكروزر 2007
 

السلام عليكم ورحمة الله وبركاته ،،

أسعد الله أوقاتكم بكل خير :)



بفضل من الله امتلكت جيب لاندكروزر جكسار 2007 ومعروف ان الموديل هذا يجي دفع رباعي مستمر ولكنه مفصول عندي والدفع خلفي فقط من المالك السابق والموتر نظيف ولله الحمد ولا يوجد عليه ملاحظات تذكر ..


واجهت مشكلتين الأولى تتمثل في زر الدبل الخفيف على مستوى كرسي السائق وتحديداً قدام الركبة وأكثر من مرة أشبك الدبل بدون قصد عند الركوب أو التعدل في الجلسة ..
والثانية ان لمبة الدبل أحيان تولع على خفيف وأحيان تكون قويه وأحيان تطفي وهذا بعد ما أشبك الدبل ..


بعد البحث المطول وجدت الجواب هنا في مكشات في الكثير من الردود تنصح بتركيب فرارات للمحافظة على عمود الدبل وحسب ما فهمت راح يخف الموتر بعد الفرارات.


سؤالي هل هناك نوع معين من الفرارات ينصح به وهل هناك نوع أتجنبه؟
وهل يفرق بعد تركيب الفرار لو كان زر الدبل منضغط أو لا قبل شبك الفرارات؟

علماً بأني من الرياض وأعلم بأن محل السليماني يقوم بتركيب هذه الفرارات والنوع الذي لديه هو البرازيلي :)


وهناك حل آخر هو نقل زر الدبل أو البحث عن الفيوزر المربوط فيه وإزالته داخل المدينة :)


.
.

بالنسبة لمشكلة لمبة الدبل قمت بشراء لمبات ليد LED وبحثت عن طريقة فك الطبلون والحمد لله فكيته وكانت النية أغير جميع لمبات الطبلون على قولتهم (مرة واحدة) لكن وجدت ان لمبة الدبل هي الوحيدة التي تظهر لي مباشرة خلف الطبلون وبقيت اللمبات توقعتها خلف الغطاء البلاستيكي الأبيض وقمت بفكه وأصبح أمامي اللوح الالكتروني الأخضر ومافيه لمبات وأتوقع اللمبات خلفه وتوقفت عن الفك وقلت نسأل قبل إذا فيه أحد قام بتبديل لمبات الطبلون على الجكسار؟
مع العلم الجكسار لمبات الطبلون عادية بينما الفكسار ليزر بالموديلات هذي..
وأنا ما أبي أقرب من العدادت بعد ما وجدت العديد يشتكون من اختلال العدادات بعد فك الطبلون لتنظيفه ..


المهم قمت بتبديل لمبة الدبل فقط ووضعت ليد حجم T5 من النت شريتها..
المشكلة الآن انها أصبحت والعة بشكل دائم ولكن نور عادي وإذا شبكت الدبل تولع بقوة والمفروض تكون طافية وإذاشبكت الدبل تولع!


الآن مجرد أشغل الموتر لمبة الدبل تكون والعة دايم ولكن بدون توهج يعني بدون دبل ومتأكد من ان الدبل مفصول وإذا شبكته يزيد نور اللمبة وهذا ما أظن طبيعي ..


علماً جربت كثير وقت التركيب وقلبت اللمبة وقلبت الفيش ما يفرق إذا الكهرب واصل تشتغل علطول واذا ركبتها مقلوبة ما تشتغل وكل لمبات الليد كذا لها طرف موجب وطرف سالب وليس مثل لمبات الهالوجين ..


حالياً راكبه ووالعه والدبل بالطبع مفصول ..


أعتذر عن عدم التصوير وقت فك الطبلون لضيق الوقت وعدم تأكدي من صحة الخطوات لأني ما لقيت شرح واضح واضطريت أجمع المعلومات من عدة مصادر ..


هنا صورة لمبة الدبل والدبل مفصول
http://www.mekshat.com/pix/upload06/...2-10-26-25.jpg


وهنا صورة اللمبة بعد ما أضغط الزر نلاحظ زاد النور
http://www.mekshat.com/pix/upload06/...2-10-26-31.jpg




للعلم ما غيرت الفيش (الراس) الي تركب فيه اللمبة ولكن استخدمت نفس الفيش فقط فكيت اللمبة القديمة وركبت الجديدة..


وهذي صورة اللمبة الليد التي قمت بتركيبها
http://www.mekshat.com/pix/upload06/...k11090_led.jpg


رابط الشراء هنا:
https://www.aliexpress.com/item/10pc...27424c4dOgCNSe



وأفكر اني أغير الراس الي تركب عليه اللمبة أو أشوف لمبة هالوجين من محلات قطع الغيار أركبها أتأكد إذا الخلل من اللمبة أو الفيش لأن لمبة البلد انتهت ما عاد تولع تقريباً ..

وأنا كل تفكيري حالياً والي يهمني هو ان بقاء اللمبة والعه ماله علاقة بعطل في نظام الدبل علماً ما واجهت فيه مشاكل ولله الحمد ويشبك ويفصل مثل أي جيب حسب ما أشوف..
علماً لا يوجد لمبة أخرى تشتغل معها مثل لمبة فحص المكينة أو غيرها ..


وشكراً لكم مقدماً.


والسلام عليكم ورحمة الله.