|
قالت لي : في صوت شي ينفخ السلام عليكم ورحمة الله وبركاته صبحكم الله بالخير الجميع في يوم من الايام تجمعت حريمنا لاجل يخبزون العجين وشبيت نار الله يكافينا شرها بنات خالي وبنات خالتي ( اخواتي بالرضاعه ) حملن مواعين العجين وماعون فيه طحين وحطينهم جنبي البنات يقطعون ويرقون العجين وحريمنا الكبيرات يخبزنه صرت امازح بنت خالي بالكلام قالت لي خالتي : يا ولد تزوجها وخلصنا بنت خالي انحاشت وتركتنا لحقتها وطلبت منها ترجع تكمل تقطيع العجين وامسكتها من معصمها قالت لي : تراني الحين اصارخ وانادي والدي جوابتها : اذا طلع صوتك لا تلومين الا نفسك تعالي معي رجعنا والبنات يقطعن العجين ويرقونه قالت بنت خالي : يوووووه بهاذ الشغل تعب بتعب نقضي ساعتين او ثلاث ساعات وفوق هاذ دخان الحطب والخشب ردت عليها امها : قطعي العجين وخلك ساكته اقولك تعالي هنا مكاني اختها الاصغر منها وقفت مكان امها تخبز العجين اللي يقطعنه بعد فتره بسيطه حوالي 5 دقايق قالت بنت خالتي : سامعه صوت شي ينفخ امها ردت عليها : قطعي العجين وخلنا نخلص البنت قالت : والله سامعه صوت شي ينفخ قمت من مكاني وطلبت من حريمنا يعطوني مجال ادور فعلا لاحظت وجود افعى سامه بين الحطب كانت بعيده عن بنت خالي مسافه حوالي متر واحد مديت يدي اليسار امسكت بنت خالي من يدها وسحبتها خلفي وعيوني مسلطه على الافعى امسكت عصا طويله وابعدت قطع الحطب انحاشت الافعى باتجاه كومه كبيره من الحجاره سحبت مسدسي وجهزته للضرب قلت لحريمنا : ودي اطلق النار لا تفزعن صوبت عليها وضربت طلقه وحده اصابتها في راسها وشقته نصين جا خالي والربع اللي في الديوان على صوت اطلاق النار وشافو الافعى السامه قالت زوجة خالي : يا ابو حاتم قلت لك شوف حل لكومة الحجاره هاذ المره الثالثه نشوف ثعبان سام ما كانت بعيده عن البنت مسافة متر واحد قال خالي : زين زين ما يخالف الحين اشوف جاري واتكلم معاه رجعن حريمنا لاجل يكملن خبز العجين قالت بنت خالي : قلت لكم سامعه صوت شي ينفخ امي مو مصدقه قاطعتها وقلت : الله لطف وقدر خلص انتهى الموضوع هاذ الكوم من الحجار لزوم نلاقي له حل خلصن حريمنا خبز العجين وحملن المواعين ودخلن البيت جا خالي ومعاه جاره وصارو يناظرو كوم الحجاره ويتكلمو خالي قال : اسمعني يا ابو صالح ويش رايك نبني سلسله حجريه بين حديقة بيتك وبين حديقة بيتي ؟ ابو صالح قال : يا ابو حاتم كذا تغلق حديقة البيت حتى لو فيها مدخل صغير خلها على وضعها رايي نجيب الجرافه ترفع هالكوم كله ونحطه في صندوق الجرار الزاعي ونرميه خارج الديره خالي قال : زين يا ابو صالح اللي تشوفه ارسلنا لسايق الجرافه والجرار الزراعي حضرو بدا سايق الجرافه يجرف الحجاره ويحطها في صندوق الجرار الزراعي لين امتلى اول نقله ورماها خارج الديره ورجع ورد سايق الجرافه صار يجرف الحجاره ويحطها في صندوق الجرار الزراعي لين ما ظل اي حجر جبت القهوه شربناها خالي عطى سايق الجرافه وسايق الجرار الزراعي حسابهم وكل منهم توجه لبيته سايق الجرار الزراعي طلع لبراة الديره افرغ حمولته ورجع للديره مسا ذاك اليوم وحنا مجتمعين في بيت خالي قالت لي بنت خالي : يا خوي يا حمود حين كنت اقطع العجين سمعت صوت النفخ ما اهتميت لكن بعد شوي سمعت صوت النفخ بطلت ارق العجين وناظرت الحطب لاجل اتوكد من الامر لانها الافعى تحت افرع الحطب ولونها قريب من لون الحطب ما عرفت اميزها لكن ظليت اسمع صوت النفيخ من هالافعى حينها صارعندي وكاد انها هالصوت من الافعى لكن ماني شايفتها والحمدلله الله ستر ولطف ما لدغت احد وكفانا الله شرها ثاني يوم تفقدنا مكان كوم الحجاره كانت تربه حمرا ورطبه احضرنا فرس غير اصيله وحرثت كل حديقة البيت ومكان كوم الحجاره ساعة زمان كنت خلصت حراثه وقام خالي زرعها طماطم كانت زوجته وبناته ومحدثكم ابو ظاري يساعدوه مع غروب الشمس اسقينا شتلات الطماطم وهاذ الطماطم لاستعمال اهل البيت مو للتجاره حيث انتاجها يكفي لاهل البيت والحمدلله انتاجها كان طيب خالي عطا لشايبتي طماطم من انتاج حديقة البيت صرت كل مره حريمنا ودهم يخبزون قبل ما امد يدي احمل الحطب اناظره واتفقده فذات مره لقيت افعى صغيره سامه بين افرع الحطب امسكتها وحطيتها داخل قنينة بلاستيك شفاف بعد ما خلصن حريمنا خبيز العجين قلت لهم : لقيت افعى سامه بين افرع الحطب بناتنا فزعن وانحاشن لداخل البيت جبت القنينه اللي داخلها الافعى شافنها حريمنا والبنات اخذت القنينه معي براة الديره مسافه حوالي 6 كيلومتر واطلقتها في منطقه صخريه حريمنا قالن لي : لو قتلت هالافعى كان افضل قلت لهم : ابعدتها عن اهل الديره وتركتها بين الصخور وهناك ما هي ارض زراعيه يوم الثلاثاء الماضي كنت راجع من المزرعه للبيت لقيت شباب اولاد جيراني متجمعين حول افعى سامه مقتوله كانت جنب بيت جاري ابو طالب بيته يبعد عن بيتي حوالي 100 متر ولانه يربي حمام ودجاج يبدو انها الافعى اشتمت ريحة هالطيور لفت للبيت لاجل تتغذى على صغار طيور جاري ابو طالب كان طول هالافعى حوالي 70 سنتمتر وهي نوعية افعى فلسطين وهي في المرتبه الثالثه من ناحية السميه بعد الاسود الخبيث والصل الاسود لغاية الان ما احد من ديرتنا شاف افعى الاسود الخبيث السنه الماضيه قتلت ثعبان من فصلية الصل الاسود كان في ساحة مزرعة خالي لكن نسيت اصوره وادرجه بموضوع في المنتدى في وادي بعيد عن ديرتنا مسافه حوالي 9 كيلو متر هاذ الوادي ما احد يدخله لانه مليء بالثعابين السامه دخله شخص واحد ما طلع منه حاولت ادخله وكنت على صهوة فرسي شهلا مشيت داخله مسافه حوالي 15 متر وبعدها رفضت الفرس تتقدم خطوه واحده وصارت تتراجع للخلف اضطريت اترك الفرس على كيفها استدارت وانطلقت براة الوادي بسرعه حاول بعض شباب الديره استكشاف الوادي بسياره دفع رباعي ناظرو الوادي من فوق واكتشفو انها في مناطق داخل الوادي ما تقدر السياره تمشي فيها لانها وعره جدا واسم هالوادي وادي الحيايا دخله شخص ثاني وطلع منه لكنه توفي على مدخل الوادي بسبب لدغ الافاعي السامه وادرجت موضوع عنه في خيمة اللسوالف الشعبيه بعنوان مفقود وادي الحيايا وسلامتكم يالربع |
| الساعة الآن 08:41 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir