|
قالت لي قلبي دليلي يمه السلام عليكم ورحمة الله وبركاته مساكم الله بالخير الجميع ابان خدمتي في العسكريه مكثت ذات مره مدة 115 يوم في وظيفتي تقدمت بطلب اجازه فوافقو علها وكانت مدتها 12 يوم اجتمعت مع ربعي في العسكريه رتبت الامور معهم وثاني يوم توجهت للديره وكنت في شوق شديد اني اشوف شايبتي بعد غيابي عنها هالفتره الطويله وصلت للبيت وكانت الساعه 8:30 صباحا طرحت السلام عليها وتحية الصباح وحبيت على يديها الطاهرتين قالت لي : طولت غيبتك علي يمه اقلقتني وانشغل بالي عليك جاوبتها : يمه ظروف حصلت لكن ابشري اجازتي 12 يوم ان شاء الله ما تطول غيبتي عنك مره ثانيه جلست في البيت تريحت وبعد الظهر توجهت مع شايبتي لبيت خالتي حبيت على ايديها وهي امي اللي ارضعتني جلست معها حوالي ساعه وبعدها توجهنا لبيت خالي ابو حاتم حريمنا اتفقو ثاني يوم يتجمعوا ويخبزو العجين مع بعضهم في ذاك اليوم بعد ما حريمنا خبزو العجين لاحظت خالتي في حاله من القلق والانشغال سألتها : ويش فيك يمه قلقانه ؟ قالت لي : يمه اختك توخرت ما هي عوايدها تتوخر لهاذ الوقت حاسه صار لها شي قلبي دليلي يمه قلت لها : يمه توكلي على الله الغايب حجته معاه مر وقت وامي تضرب اخماس باسداس كل ما تسمع صوت سياره تطلع على طرف حوش بيت خالي تناظر اذا وصل طلاب وطالبات الجامعه بعد حوالي 15 دقيقه لفانا ولد يقول باص طلاب الجامعه سوا حادث سير خالتي قالت : اويلاه يمه اختك الغاليه ويش صارلها يا خفي الالطاف تلطف بينا طلعت بسيارتي وامي معي وخالي ابو حاتم وانطلقت اتجاه موقع حادث السير ولحقوني اولاد خوالي بسيارتين كانت امي تتضرع الى الله عزوجل انه بنتها واللي معها في الباص ما حصل لهم مكروه وخالي كان يقول : لطفك وسترك يارب يا رب تجيب العواقب سليمه يا الله عفوك وسترك يا رب حين وصلت موقع حادث السير لقيت قدامي حوالي 5 سيارات لاهل الديره نزلت وخالي ندور بنت خالتي وبنات خالي لاحظت اغلب الركاب اصاباتهم خفيفه والحمدلله شفت اختي بالرضاعه تمسك بنات خالي بيدينها وهم يبكون اندفعت صوبهم تطمنت عليهم وخالي كان يهدي من روعهم اخذناهم لسيارتي خالتي حين شافت البنات يبكون ما تحملت وطبيعة الحريم الحنان والعاطفه ورقة العواطف حظنتهم ودموعها تغرق وجهها اطلعت البنات في سيارتي كان عددهم 6 رغم انها تتسع لاربع ركاب بالاضافه لي خالي اركب بعض بنات وحريم الديره بسيارة اخوي حاتم وقاله : يبه يا حاتم اسمعني زين كل وحده منهم توصلها لباب بيت اهلها وطلع بالسياره الثانيه وتوجه لاقرب مركز شرطه وابلغ عن وقوع حادث سير على طريق ديرتنا حين وصلت شرطة المرور لاحظت وجود بقعة زيت كبيره على الشارع وهي سبب تزحلق باص الطلاب سايق الباص من ديرتنا اسمه خلف قال لشرطة المرور انه كان يسوق الباص في طريقه للديره وفي منطقة وقوع الحادث شاف بقعة الزيت انحرف الى اليسار لانه الى اليمين حافه عاليه ومافي مجال ينحرف لها وتابع سيره الاطارات الخلفيه جت على بقعة الزيت فتزحلق الباص رغم انها طبيعة منطقة وقوع الحادث ما تسمح للباص يكون منطلق بسرعه وسايق الباص ما هي من عوايده السواقه بطيش ورعونه وسرعه عاليه حاول السايق يثبت الباص لكن قدر الله وما شاء فعل انحرف الباص 180 درجه وارتطمت حافة الباص الخلفيه بشجرة صنوبر معمره وتوقف والحمدلله كانت اصابات الركاب بسيطه رضوض وخدوش بسيطه وكل الركاب وصلوا بيوتهم تبرع شخص من اهل الديره احضر عربه رمل 1 متر معكب وطرحها على بقعة الزيت حين تشرب الرمل بقعة الزيت كشطها بجرافه صغيره وطرحها داخل شاحنه قلاب سايق شاحنة القلاب نقل الرمل الي تشرب الزيت لمنطقه يرمون فيها بقايا مواد البناء وطرحها هناك وطرح القسم الثاني فوق البقعه وتركه عليها وبعد البحث والتحري من قبل الشرطه توصلت للشخص اللي تسبب بوجود بقعة الزيت على الشارع وادى للحادث تم سحب رخصته وتغريمه الباص تم اصلاحه من الاضرار اللي حصلت له حين رجع خالي على البيت جلس مع بناته فتره وجا على بيت خالتي تطمن على اختي من الرضاعه كان الحادث على ما اذكر يوم الخميس وفي ذاك الوقت كان العطله يوم الجمعه قالت لي اختي بالرضاعه : نصيتك يا حمود يوم السبت توصلني وبنات خالي على الجامعه وبعد الدوام ترجعنا للديره قلت : ابشري يا خيتي اوصلكم للجامعه وارجعكم للبيت بعد ما تخصلو محاضراتكم في يوم السبت اخذت اختي بالرضاعه ( بنت خالتي ) وبنات خالي للجامعه ورجعتهم للبيت بعد ما خلصوا محاضراتهم ظليت على هالمنوال مدة 4 ايام لين تم اصلاح الباص اللي ينقلهم للجامعه كانت تقولي خالتي ( امي بالرضاعه ) : من يوم صار حادث الباص يمه اختك ما تعرف تنام زين تترك فراشها وتجي تنام عندي تراودها الكوابيس اقرا عليها المعوذات وتنام قلبي دليلي يمه حين توخرت اختك عرفت انه صار لها شي والحمدلله جت سليمه قدر الله وما شاء فعل ودووووم نقول الحمدلله على السراء والضراء هاذ الحادث مر عليه حوالي 20 سنه اليوم عندنا في الديره باص سعة 50 راكب وباص صغير سعة 20 راكب لطلاب وطالبات الجامعه واهل الديره وما زال خلف يسوق الباص الكبير سعة 50 راكب ومضى على عمله في شركة الباصات 22 سنه وسلامتكم يالربع |
| الساعة الآن 06:23 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir