|
ما لكم عندي نصيب السلام عليكم ورحمة الله وبركاته مساكم الله بالخير الجميع في يوم حصلت ملاسنه بيني وبين شخص من الديره هاذ الشخص ما هو بالرجال السوي نزق الطباع سريع الغضب والانفعال لقبه في الديره الاجقم حين صار يصارخ علي ويتهدد ويتوعد قلت له : اذا شتمت ابوي او امي ترى والله ما يحصلك خير وانصحك نصحيه لوجه اللله تعالى لا تختبرني اغلب الموجودين قالو له لا تغلط واحفظ لسانك اتذكر واحد من الشباب قاله : اذا شتمت والد او ام حمود ترى تشوف شيء ما يسرك وانتهى الموضوع على خير بعد 3 ايام كنت مع خوالي وصديقنا ابو مرزوق في الديوان جا شاب على الديوان وجلس صبيت له الفنجال شربه وقال : ودي اقولك شيء يا ابو حاتم حصل امس بالليل قريب الساعه 10.30 خالي رد عليه : اسمعك تفضل قول اللي عندك الشاب ناظرنا وقال : يا ابو حاتم لك يد بيضا عند شايبي ما ننكرها والله الليله الماضيه كنت راجع للبيت مريت من جنب بيت فلان سمعت ابنه الاجقم يتكلم مع ولد فلان حيث قال : المشكله اللي صارت بيني وبين حمود ما انتهت ودي اضايقه وامنعه يجلس في المكان اللي اكون فيه رد عليه ولد فلان : المشكله هاذ انتهت ولا تكبرها ما هي مستاهله وشلون ودك تضايقه وتمنعه يجلس بالمكان اللي تكون فيه الاجقم قال : اول شيء ودي اخلي شايبي يخطب لي بنت الشيخ ابو حاتم وما ناقصني شيء اموري الماديه تمام وبالنسبه لمشكلة حمود نقول انتهت واحب على راس حمود قدام الربع وما اظن انه ابو حاتم يرفض وخاصه اني انهيت المشكله بعدها حين يصير النصيب اقول للبنت ودي مبلغ اشغله بمشروع تاخذه من ابوها على سبيل السلف بعد مده اقول لهم المشروع فشل وما اظن ابو حاتم يقول لبنته ودي الدراهم اللي اخذها زوجك قال ولد فلان : تظن انه الشيخ ابو حاتم ساذج لهاذ الدرجه والامور تمشي بكل هاذ السهوله تراك ابن امس ما عرفت الشيخ ابو حاتم المثل يقول ( اتقي شر الحليم اذا غضب ) انصحك لا تقدم على هاذ الخطوه لانك الخسران وخذها مني ابو حاتم ما يعطيك الاجقم مصمم على موقفه يا ابو حاتم هاذ اللي سمعته يا ابو حاتم حبيت اقولك اللي صار وانبهك هاذ الاجقم ما ينفع معاه المعروف خالي رد عليه : توكل على الله يصير خير إن شاء الله يظن اني جاهل وما اعرف اميز الرجال استأذن الشاب وراح لحال سبيله صديقنا ابو مرزوق قال لخالي ابو حاتم هاذ الولد ما يسحتي على نفسه جاني شايبه يطلب بنتي الكبيره اللي تزوجها ولد اختك ام متعب رفضته رفض قاطع بعد حوالي 15 دقيقه جا شايب الاجقم وقال لخالي ودي ازوك الليله يا ابو حاتم خالي رحب فيه بعد صلاة العشا جا الاجقم وشايبه وشايبته جلس الاجقم وشايبه في الديوان وسولفو بمواضيع بعد حوالي من ساعه جلوسنا في الديوان شايب الاجقم طلب بنت خالي زوجه لولده على سنة الله ورسوله وقال وبالنسبه للملاسنه اللي صارت بين ولدي وبين حمود اولدي يعتذر لحمود ويحب على راسه قدام الربع خالي رد عليه : بالنسبه للملاسنه هاذ شي طبيعي يصير بين اثنين وما هي مستاهله وبالنسبه للخطبه ما عندي بنات للزواج بنتي تدرس في الجامعه ما لكم عندي نصيب حين سمع الاجقم جواب خالي ناظرني وصارت عينه ترف وانتفخت اوداجه ( شرايين رقبته ) لاحظت انه صار يشد قبضة يده ويعض على شفته السفلى شايب الاجقم قال : اذا على الدراسه ننتظرها لين تخلص دراستها . خالي رد عليه : ما اخلي بنتي مخطوبه سنه ونص والزواج قسمه ونصيب وما لكم عندي نصيب استأذن الاجقم وشايبه وراحو لبيتهم صباح اليوم التالي توجهت لوظيفتي غبت عن الديره مدة شهرين حين رجعت ارتحت في البيت وبعد عصر ذاك اليوم توجهت لبيت خالتي مع شايبتي جلسنا فتره وبعدها توجهنا لبيت خالي ابو حاتم حين دخلنا شفت خالي طرحنا السلام وحبيت على يد خالي ابو حاتم سحبها وهو يقولي الله يرضى عليك الله يرضى عليك يبه جلست معه على البساط بطرف حوش البيت قلي خالي : هاذ شايب الاجقم ارسلي 4 جاهات لاجل اوافق على زواج ولده من البنت وكان جوابي رفض قاطع ونهائي ما لهم نصيب عندي قلت يبه : هاذ الاجقم مثل ما قال ولد فلان مصمم وما هو محيد عن اللي في راسه خالي رد علي : وبعدني يبه مصمم على رايي ما له نصيب عندي لفانا صديقنا ابو مرزوق طرح علينا السلام وردينا عليه وجلس صبيت له الفنجال شربه وهزه ورجعه لي غسلته وحطيته مع الفناجيل ابو مرزوق قال : يا ابو حاتم شايب الاجقم نصاني اتكلم معاك لاجل توافق على زواج بنتك من ولده والصراحه تعذرت له وبلغته هاذ الامر ما اقدر اتكلم معاك فيه خالي قله : وبعدين يا ابو مرزوق يا خويي يا رفيق العمر وبعدين ما ودنا ننتهي من هالسالفه تدخلت بالموضوع وقلت : اسمعني يبه اذا هالامر وده يظل على هالمنوال ودي البنت زوجه لي على سنة الله ورسوله خالي قلي : يبه ما عندي اعتراض عليك لكن يبه هاذ الامر يخصها وما اقدر اجبرها على الزواج هاذ حياتها لكن ابشر الحين اكلمها قمنا ورحنا على البيت خالي نادى على بنته وقال : اسمعي يبه ولد عمتك حمود يطلب يدك زوجه له ويش رايك ؟ ردت بنت خالييبه حمود رجال ونعم الرجال غانم سالم لكن يبه هاذ اخوي اللي تربيت معاه ما اقدر اتصوره زوج لي هاذ اخوي اخوي يبه ما ظل بنات في الديره يبه كلمه وقلتها ما ودي اتزوج الحين عندي دراسه بلغ شايب الاجقم ما يرسل لك جاهات يطلبني انتهينا وانت يا حمود على عيني وعلى راسي لكنك اخوي ولا تزعل مني قلت : يا بنت خالي ماني بزعلان لكن ودنا هالموضوع ينتهي كل فتره تجي جاهه الديره كلها تتكلم بهالموضوع طلعنا من البيت ورجعنا للديوان خالي ارسلني اطلب ازواج خالاتي وشايب صديق طفولتي حميدي رحت بلغتهم خالي يطلبكم الحين ضروري لزوم ارجع له وانتم معي رجعت لخالي ومعي ازواج خالاتي وشايب صديق طفولتي قال لهم خالي : اسمعوني تروحو لشايب الاجقم وتقولو له الموضوع وصل حده لا ترسل لابو حاتم اي جاهه ما ظل بنات في الديره الا بنتنا رغم انه قالك لا ترسل لي اي جاهه ما لك عندنا نصيب توجهو رجال ربعنا لبيت شايب الاجقم وتكلمو معاه جلسنا ننتظر ربعنا يرجعو لنا بعد حوالي ساعه ونص رجعو لنا رجالنا وبلغو خالي انه الموضوع انتهى ما في جاهات بعد هاذ اليوم حينها قال : الحمدلله انتهينا من هالموضوع صارلنا شهرين جاهه تروح تيجي جاهه ثانيه الاجقم كان نصيبه بنت من ديره بعيده عن ديرتي حوالي 35 كليومتر قبل حوالي اسبوعين تم طلاق الاجقم من حرمته لانه ما عادت تحتمل تعامله معها بنت خالي تزوجها اخوي بالرضاعه ( ابن خالتي ) وعندهم 4 اولاد ولله الحمد والفضل وسلامتكم يالربع |
| الساعة الآن 05:19 PM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir