|
كبارنا واللغه الانجليزيه عند شبابنا السلام عليكم ورحمة الله وبركاته مساكم الله بالخير الجميع في احد فصول الخريف البارد كنت في اجازه من وظيفتي اول يوم وصلت البيت دخلته طرحت السلام على شايبتي الله يشافيها ويعافيها وحبيت على يديها صارت تسحب يدها وتقولي الله يرضى عليك *** الله يرضى عليك رضا ربي ورضا قلبي لاحظت انها كانت خلصت العجين وغطت ماعون العجين ما صار وقت العصر كان العجين تخمر وصار جاهز للخبيز سمعت طرق على الباب رحت فتحت الباب كان ولد صغير قلي : عمتك ام صالح تناديك ضروري رحت اشوفها اول ما وصتلها طرحت السلام عليها وحبيت على يدها قالت الله يرضى عليك يا حمود خذ ماعون العجين وديه لبيت خالك ابو حاتم وديت ماعون العجين ورجعت للبيت اخذت ماعون عجين شايبتي ورحت فيه على بيت خالي لقيت خالاتي واختي الاكبر مني وزوجة خالي ابو محمد قالت لي امي بالرضاعه ( خالتي ) : روح يمه شب النار بالفرن ودنا نخبز العجين . رحت قطعت حطب وخشب سويت كومه وجبت الفرن رفعته على عدة احجار صلبه وبديت اشب النار داخله سمعت صوت ناظرت خلفي اذا بنت خالي راجعه من وظيفتها بالعسكريه ومعها بنت كانت ضيفه على بيت خالي طرحت السلام علي رديت السلام قالت بنت خالي : هاذ هو حمود اللي سولفت لك عنه اخوي اللي تربيت معه وبنفس الوقت ابن عمتي كملت كلامها وكاد فيه خبيز ودي اروح ابدل هدومي وارجعلك غابت فتره ورجعت كانت تحمل ماعون عجين عمتي ام صالح وجت اختها وبنت خالتي ( اختي بالرضاعه ) وحريمنا الكبيرات البنات صرن يقطعن العجين ويرقونه وحريمنا الكبيرات يخبزن اول ما بدين الخبيز بدت اختي الاكبر مني تخبز عجين عمتي ام صالح الله يرحمها واموات المسلمين كنت منشغل بشب النار سمعت بنت خالي تقول : قم يا خوي شوف جا العنيف هاذ متسلط علي دوم ينقيني من بين اهل البيت ناظرت اذا هالكبش واقف يناظرنا امسكت جركن المويه ورميته عليه رجع لمكانه في الحوطه صرن بنت خالي واختي بالرضاعه يتكلمون بالانجليزي سمعت مفردات مثل افاريج كوست , تاسك ,جرنسي , دبت , كريدت خالتي قالت : ويش ترطنيين يا بنات ؟ قالت بنت خالي : يا عمتي نتكلم عن مواد ناخذها في محاضراتنا بالانجليزي قالت خالتي : حكينها بالعربي وين المشكله قالت بنت خالتي: يمه هاذ الكلمات ما لها ترجمه بالعربي واذا لها ترجمه تجي ترجمتها طويله حيث انها تكون 6 او 7 حروف تعني كلمات كثيره احرف تختصر الكلمات سكتت خالتي وسمعتها تمتمت ببعض الكلمات ما فهمتها عرفت انه الوضع ما هو عاجبها كل شوي البنات يتكلمون انجليزي خالتي ما ظل عندها صبر قالت بعصبيه : وبعدين وبعدين بالرطن هاذ اسمعن اما تتكلمن بالعربي او تسكتن هاذ الكلام تحكوه هناك في الجامعه قمت لاجل اغير الجو صرت اغني وبنت خالي الكبيره صارت تطبل على الصينيه على وقع كلمات الاغنيه خالتي دقتني بكتفي واشرت لي بيدها : يعني انتبه للحطب والخشب لا تخلي النار تخمد صرت احط حطب وخشب بالفرن وتابعت الاغنيه حينها نفذ صبر خالتي قالت لي : انت واحد هامل شايفنا فاضيين للاغاني ما ظل الا تسوي صف الدحه . جاوبتها : زيين ولا يهمك يمه الحين انادي الربع ونسوي لك صف دحه ما تنسيه ابد قالتلي بعصبيه : شكلك ودك تربايه من جديد هاذ اللي شاطر فيه كلام ماسخ مثلك ناظرت حولها شافت عصا صغيره على الارض حملتها وجت ودها تضربني فيها قالت : والله ما اقدر صار رجال اطول مني شلون اضربه ؟ حطيت على الجرح ملح وسكتت لين خلصنا الخبيز قمت تروشت وبدلت هدومي حملت ماعون عمتي ام صالح واوصلتها لبيتها رجعت جلست مع خالاتي وشايبتي والبنات سمعت التيلفون يرن كانت خدمة التلفون صارلها في الديره بحدود شهرين او 3 شهور قمت رفعت السماعه رديت كان على الخط حرمه قالت لي بلغه عربيه مكسره : ودها تكلم اختي بالرضاعه حيث نطقت لي باسمها قلت لاختي بالرضاعه : حرمه اجنبيه ودها تكلمك ردت اختي وصارت تتكلم معاها بالانجليزيه حوالي 10 دقايق والكلام كله بالانجليزي طلبت مني اختي قلم وورقه عطيتها كانت اختي تتكلم وتكتب بالانجليزي لين انهت المكالمه قالت خالتي : ويش هاذ كل هالوقت وانتي تتكلمين مع هالحرمه الاجنبيه من هاذ الحرمه ؟ اختي قالت : يمه هاذ معيده تدرسنا ماده معينه ومثل ما شفتي سجلت كل الملاحظات لاجل بعد باكر عندنا اختبار قالت خالتي ام حاتم :شايفه يا ام فارس شلون العلم زييين حنا ما رحنا المدارس ولا كان على زماننا مدارس حرف ما نعرف نكتبه ولا نعرف نقراه نحفظ من القرآن الكريم سورة الفاتحه والمعوذات خالتي صارت هزت راسها وقالت : صحيح الحمدلله اولادنا وبناتنا راحو المدارس والجامعات وتسلحو بالعلم مو مثلنا ظلينا ما نعرف شي غير شغل البيت والتعب والحمدلله ربينا اولادنا وبناتنا على الادب والاخلاق الحميده والحشمه بعد سنتين نجحت بنت خالتي ( اختي بالرضاعه ) حاولت انها تقنع والدها وامها لاجل تشتغل لكنهم رفضو رفض قاطع بعد تدخل من خوالي وافقو انها تشتغل في الشرطه النسائيه بعد 6 شهور تم نقلها لمعهد تدريب الشرطه النسائيه خلال ذيك الفتره تزوجها صديق طفولتي اشتغلت مدة 6 سنوات في الشرطه النسائيه ثم قدمت طلب اعفائها من الخدمه حيث انها اشتغلت المده القانونيه لطلب الاعفاء وهي 5 سنوات وتمت الموافقه على طلب اعفائها من الخدمه وانهت خدمتها في الشرطه رتبة وكيل اول وسلامتكم يالربع |
| الساعة الآن 02:11 AM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir