|
قالت : ما عرفتو التعب والشقا زين السلام عليكم ورحمة الله وبركاته مساكم الله بالخير الجميع في يوم كنت في البيت عندي اجازه من وظيفتي ارسلت لي امي بالرضاعه ( خالتي شقيقة شايبتي ) توجهت لبيت خالي ابو حاتم لقيت بعض محارم العائله متجمعات لاجل يخبزون العجين كان هناك خالاتي وعمتي ام صالح الله يرحمها واموات المسلمين وشايبة صديق طفولتي وزوجة خالي بنت عم شايبتي الله يشافيها ويعافيها وصلت طرحت عليهم السلام ردو علي السلام قالت لي خالتي : الله يرضى عليك يمه شب النار في الفرن خلنا نخبز العجين . قلت : ان شاء الله عطني وقت اقطع بعض الحطب والخشب رحت قطعت بعض الحطب والخشب احضرت الفرن افرغت معظم الرماد اللي داخله وحطيت قطع من الخشب والحطب واشعلت النار في داخل الفرن بعد فتره بسيطه جت اختي بالرضاعه ( بنت خالتي ) ومعها بنت خالي احضرو المواعين والطحين وصواني لاجل يرقون العجين عليها حطو المواعين وجلسن البنات ناظرتهم قالت اختي بالرضاعه : ودي اروح اسوي شاي للجميع راحت وظلت عندي بنت خالي قامت صارت تقطع العجين تسويه مثل الكوره الصغيره وترش عليه شيء من الطحين وتحطه على الصينيه الكبيره توافدن محارم العائله وجلسن قالت خالتي ( امي بالرضاعه ) لبنت خالي : الله يرضى عليك يا بنيتي ناوليني الصينيه لاجل نبدى نرق العجين اخذت الصينيه من بنت خالي وعطيتها لخالتي اخذتها خالتي وصارت ترق العجين رفعت غطا الفرن كانت الحصى داخل الفرن حار جدا خالتي رقت اول رغيف وحطته فوق الحصى الحار لحظات وقلبته على وجهه الثاني صبرت شوي ورفعت الرغيف وحطته على طرف كانت شايبتي رقت الرغيف الثاني اخذته خالتي ام حاتم وحطته على الحصى وقلبته وحطته فوق خويه وهيك على التوالي مرار وتكرار شيء يرق الرغيف وشيء يقلب الرغيف فوق الحصى توقفنا شوي وغطيت الفرن لاجل الحصا يكتسب حراره قويه من جديد خالتي قالت لبنتها وبنت خالي : رحن رتبن فراش الغرفه وجبن معاكن الشرشف الابيض لاجل نغطي الخبز فيه قالت بنت خالتي : يوووووه وبعدين يمه تعبت خلنا نرتاح شوي من الصباح شغل بشغل ما ارتحت ردت عليها خالتي بحزم : ما عرفتو التعب والشقا زين انتم جيتم على النعيم ويش هو التعب اللي تتعبوه الصبح تروحون للجامعه ترجعون بعد الظهر تاكلون وتنامون نقول زين خلهم لاجل انهم يدرسون ودنا يحصلون علامات زينه في اختباراتهم الله يرحم ايام التعب والشقى اللي عرفناه كانت جدتكم الله يرحمها واموات المسلمين تصحينا بعد صلاة الفجر نقوم نشطف البيت ونمسحه ناهيكم عن يوم الغسيل ما كان عندنا الغسالات الموجوده اليوم في كل بيت نغسل الهدوم ونعصره من المويه على الايدي ونعلقه على الحبال لاجل يجف حديقة البيت ننظف الزرع اللي فيها من العشب ونسقيه مويه في الايام اللي حرارتها شديده كنا نروح نحلب الشياه في البر ونرجع بالحليب للبيت ونبدا هاذ نسويه جبن وهاذ نسويه زبده وهاذ نسويه سمن وهاذ نسويه لبنه نروح حصاد القمح من الفجر للظهر بعد حصاد القمح ندرسه بالدراسات القديمه على الخيول والدواب لاجل ناخذ القمح منه وقطف الزيتون من الصبح للمغرب وحنا نقطف الزيتون الزاد نطبخه في البر كل يوم نحمل مواعين الطبخ نطبخ في البر وحين نرجع للبيت ننظفها وننقى الزيتون من الشوائب هاذ ام حاتم طلعت معنا لقطف الزيتون ويدها كانت في الجبيره والا انا غطانه يا ام حاتم ؟ قالت خالتي ام حاتم : كل اللي قلتيه صحيح يا بنت عمي يا ام فارس الجيل هاذ ما عرف ويش التعب والشقى التعب والشقى كان على دورنا الله يرحم ذيك الايام قامت اختي وبنت خالي رحن رتبن الغرفه واحضرن شرشف الخبز كملن حريمنا خبز العجين حين انتهينا عديت الارغفه كان مجموعها 80 رغيف استغرق وقت خبزها ساعتين ونص بالتمام والكمال خالتي ام متعب قالت : ويش هالجيل هاذ ذيك اليوم البنت الصغيره اللي عمرها 18 سنه اناديها ما ترد علي رحت اشوفها اذا هي متسمره قدام التلفزيون تناظر مسلسل قمت غلقت التلفزيون طلبت منها تساعدني في تخليل الباذنجان والخيار والطماطم هاذ جيل ماسخ ما يعرف وين مصلحته عمتي ام صالح رحمها واموات المسلمين قالت : يا بنات شوفو ولد خالتكم حمود الله يرضى عليه حين طلبنا منه يشب النار لاجل نخبز ما تردد ولا تعذر ناظرتني وسألتني متى رجعت من العسكريه اليوم جاوبتها : صار لي 3 ساعات في الديره كملت كلامها ما لحق يجلس ويرتاح جبناه لاجل يشب النار وشفتم بعيونكم طول الوقت وهو جالس قبال النار الله يكافينا شرها اللهم آمييين ***** اللهم آمييين شوفو وجه صار لونه احمر من وهج النار وثوبه تلطخ بالرماد وبقايا الفحم قوم يمه تروش وغير هدومك الله يعطيك الف الف عافيه تدخلت زوجة اخوي حاتم وقالت : خلص يا حريمنا يكفي عتاب ومعاتبه خلن هالبنات يرتاحن قمت من مكاني سمعت صوت صخب الاطفال ناظرتهم اذا بنت اخوي حاتم مبلله هدومها بالمويه قلت لزوجة اخوي حاتم : شوفي الغزاله الصغيره بللت هدومها وشعرها بالمويه زوجة اخوي ناظرت بنتها وكان عمر هاذ الصغيره ذاك الوقت 4 سنوات كانت هدومها مبلوله وشعرها بعد مبلول ينقط مويه قالت زوجة اخوي : وبعدين مع هالصغيره هاذ قبل ساعه روشتها ولبستها هدوم نظيفه رحت جبت البنت الصغيره لامها قامت امها ودها تضربها وصارت تسمعها كلام قالت زوجة خالي : يكفي غيري هدومها ولا تضربيها والا ترى والله تشوفين مني شيء ما يسرك هاذ طفله صغيره ما تعرف الزين من الشين ما تميز الصح من الغلط والا نسيتي نفسك زمان وانتي صغيره طلعنا للبر نحلب الشياه صرتي ترمين الحصى على حمود وتطلعين له لسانك وصرتي تقولين له ابوي صاحب الحلال وابوك راعي الحلال انت ما تسوى شيء قام شايبك قالك : غلقي فمك هاذ اللي فالحه فيه وان كنت صاحب حلال يعني راعيه ارعى حلالي ما فيها شيء انقلعي عند امك ساعديها قلت : خلص يا يمه كانت صغيره وحنا صغار ساوينا اشياء بعفويه وما كنا نقصدها قالت لي زوجة اخوي حاتم : تعال يا خوي اعطيك من هدوم حاتم لاجل تبدل هدومك بعد ما تتروش اعطيني هدومك اغسلها لك من اثار الرماد والفحم رحت تروشت وغيرت هدومي اعطيت الهدوم اللي تلطخت بالرماد والفحم لزوجة اخوي غسلتها ورحت جلست مع الرجاجيل في الديوان خالاتي كل وحده منهم حملت الخبز في ماعونها ورجعت لبيتها ذيك الليله سهرت في بيت خالي وكان معي شايبتي ناظرت ساعة يدي اذا الساعه 11 في الليل قمت ومعي شايبتي لاجل نروح بيتنا قلي خالي : تقضون ليلتكم هنا وما هي اول مره خلكم هنا وهاذ اللي صار قضينا ليلتنا في بيت خالي الله يطول بعمره ما عرفت لي أب إلا خالي ابو حاتم حيث انه رباني بعد وفاة شايبي الله يرحمه واموات المسلمين وكان عمري سنتين رعاني لين رحت للعسكريه ولحقت ملاحيق الرجال وتزوجت والحمد لله دائما وابدا وسلامتكم يالربع |
| الساعة الآن 12:33 AM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir