|
رحت انا واسرتي لروضة خريم وفشلنا ،، حتى روضة التهات وفشلنا .. (نداء لخبراء الكشتات) هلا فيكم يالغاليين حبينا نفرش بساطنا زي اي عايلة تفرش بساط ويستانسون بالاجواء لكن ياجماعة اول مرة نروح روضة خريم طلعنا الساعة 11 الصبح من حي الشفا بجنوب مدينة الرياض جينا بندخل قالوا هذي الروضة خريم للملك قلت طيب وشلون الناس يصورون منها وهم كاتبين انهم بروضة خريم قال فيه على حدود الملكية عواميد حديدية (اركن سيارتك على جنب وادخل من بين هالعواميد) دخلت هالحدود وما انكر ان بطانة رفرف سيارتي تدمرت بالكامل وماشفنا خضره تشرح الصدر (الجو شمس والارض يابسه) قلنا نروح روضة التنهات دام تبعد عن خريم بربع ساعة رحنا للتنهات ونفس الوضع لكن قلت مشينا ننزل بدون مقاضينا يمكن نلقى شي يوم مشينا قرابة ربع ساعة (على اقدامنا) بعد حدود عواميد حديدية روضة التنهات لقينا خضرة بنسبة 60% قلت اقعدوا هنا وانا بجيب الاغراض صرت رايح ربع ساعة راجع ربع ساعة 3 مرات يعني ساعة ونص رايح جاي (رجليّه) اجيب الاغراض ماقدرنا نطبخ الهوى قوي علينا وذبابين وش كثرهن وحشرات ماخلت اكلنا في حاله زين اننا شربنا قهوة بالقطّارة والباقي ماعرفنا ناخذ راحتنا حتى معنا طفل ابو 7 شهور ماعجبه الجو قام يصايح لين امه قالت مشينا بس مانبي نقعد وركبنا السيارة وحالتنا حالة لدرجة ان سيارتنا من داخل ريحتها تطريش بنتي الصغيرة يعني جو الله لا يوريكم هههههههههه السؤال : متى اطلع لروضة خريم او التنهات؟ ووش التجهيزات لروضة خريم او التنهات؟ ووش المتطلبات؟ ياليت تفيدوني لا هنتم |
| الساعة الآن 11:33 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir