|
البغل الجامح جاب الغثا السلام عليكم ورحمة الله وبركاته مسيكم بالخير الجميع يوم الجمعه الماضي توجهت لمسجد الديره لصلاة يوم الجمعه وكان معي ولدي ضاري مشيت مع خالي واولاده بعد ما فرغنا من الصلاه توجهت لبيتي تغديت وتمددت على فراشي غرقت في النوم صحيت على اصوات ضجيج وصخب قوي دخل ابني ضاري غرفتي بسرعه قلت : يا دافع البلا يا الله يا ستار استر قلي ابني : يبه هاذ بغل ابن خؤولة جدتي حطم سياج الحديقه طلعت اشوف ويش صار حين طلعت من باب البيت اذا البغل حطم معظم سياج الحديقه وفوق هاذ يحاول يقفز من فوق سياج حظيرة الخيول وحصاني الاغر يصهل ويرافس برجوله تجاه البغل امسكت بقطعة خشب وصرب اضربها بجدار البيت ناظرني البغل وانحاش باتجاه حديقة جاري ابو عوده فحاسها وانطلق بعدها لحديقة جاري ابو طالب فحاسها وكمل طريقه باتجاه طرف الديره ما خلا حديقه بطريقه إلا حاسها وخرب زرعها توجهت مع جيراني لبيت ابو عبدالله ابن خؤولة شايبتي الله يشافيها لقينا سعد ولد ابو عبدالله فسألني : شفت البغل يا ابن عمتي. قلت له : حطم سياج حديقة البيت وحاس حدايق جيراني وكمل طريقه لشرق الديره . كملنا طريقنا لبيت ابو عبدالله وسعد راح يدور هالبغل الجامح لقيت خالي في الشارع وكان من ملامح وجهه من متكدر طرحنا عليه السلام رد عيلنا السلام قلت : عسى ما شر يبه ويش كدر خاطرك وخلاك زعلان ؟ جاوبني : هالبغل جاب الغثا لاهل الديره حاس حديقة البيت وهدم طرف حظيرة الاغنام والخيول وهاجم على ام حاتم وزوجات اولادي عبدالمحسن وسلمان وفوق هاذ وده يدخل الديوان ما ظل إلا يجلس ونصب له الفنجال توجهنا لبيت ابو عبدالله حين شافنا رحب فينا وادخلنا غرفة الضيوف قال : والله اني اعرف هالدابه خربت حدايق الربع وحدايقكم اللي ودكم اياه تاخذوه بالصاع الوافي والله اني خجلان منكم رد عليه خالي : يا ابو عبدالله ما همني يخرب الحديقه وزرعها يا ابن خالي هالدابه هاجمت ام عيالي وزوجات اولادي انت ما شفت زوجة ولدي سلمان حين طاحت بالارض الله لطف انه هالبغل ما وطاها بحوافره لولا اني رميت عليه جركن المويه لكان الله العالم ويش صار في زوجة سلمان إن خلصت معي ما تخلص مع شايبها واعمامها واخوالها ضاق الصدر يا ابن خالي وبعدين وبعدين يا ابو عبدالله اربط هالدابه وفكنا من غثاه ابلشنا وابلش الديره تعذر لنا ابو عبدالله وقال ابشرو يالربع لين نمسكه اربط ارجوله الاربع بقيود الحديد حين طلعنا اذا 3 رجاجيل من الديره يصارخون على ابو عبدالله لانه البغل الجامح حاس حدايقهم وخرب زرعهم خالي صار يناظر ابو عبدالله وقله : رضيت يا ابن خالي رضيت اربط هالدابه ابو عبدالله قال : خلص ما ظل قدامي حل إلا أطلق النار على هالبغل وارتاح وترتاحون من غثاه قلت له : ودك تحمل خطية هالدابه في رقبتك بعد هالعمر يا ابن خالي قربت على 70 امسح وجهك بالرحمن وتعوذ من الشيطان الرجيم عذ بالله من الشيطان الرجيم تكلمنا مع الرجاجيل ووعدهم خالي يعوضهم بدل خسايرهم لكنهم رفضو كان طلبهم الوحيد هالدابه تنربط لاجل ما تسبب اذى لاهل الديره مضى بقية ذاك اليوم في حدود الساعه 8 في الليل سمعت صوت ضجيج في حوش البيت طلعت اشوف ويش السالفه إذا البغل واقف وحين شافني اطلق ذاك الشحيج وراح صوب حظيرة خيولي ويقوم يقفز داخلها وتقوم معركه حامية الوطيس بين هالجامح وحصاني الاغر انطلقت صوبهم حملت نبوت طويل نستعمله لاسقاط ثمار الزيتون اللي تكون في قمم الشجر صرت اضرب البغل انحاش البغل بعد ما اصاب حصاني ببعض العضات في رقبته وحصاني ما قصر معاه عضه عدة عضات رجعت للبيت ودقيت على خالي وسولفت له اللي حصل قلي : الله يمضي هالليله على خير الله يعين يبه تصبر الصباح رباح صباح يوم السبت الساعه 7 طلعت من البيت وتوجهت لحظيرة خيولي ودي اسرج حصاني واتوجه للمزرعه اذا البغل الجامح واقف في حديقة جاري ابو عوده وياكل البرسيم المزروع فيها طردته انطلق صوب شرق الديره تفقدت حصاني كانت اثار بعض العضات الخفيفه على رقبة حصاني الاغر انتبهت على حجر كان عليه اثار دم جاف رجعت تفقدت حصاني زين ما في اي جرح اسرجت فرسي العبيه رباب اخذت معي حبل طويل وانطلقت صوب المزرعه في طريقي لقيت اولاد ابو عبدالله يدورون البغل سولفت لهم اللي صار في الليل وكملت طريقي قضيت شغلي والحمدلله ورجعت لبيتي وحين كنت ودي ادخل حوش البيت سمعت صوت امي بالرضاعه ( خالتي ) اخت شايبتي انطلقت صوب بيت خالتي إذا هالبغل يستمتع باكل بعض زرع حديقة بيتها ملفوف وخس وطماطم حين شافني اطلق ذاك الشحيج وانطلق صوب سلسه حجريه ارتفاعه حوالي 180 سنتمتر وقفز من فوقها قفزه مريعه لاحظت انها اذن البغل مشقوقه من طرفها توكدت انها انشقت بسبب معركته مع حصاني الاغر كنت اوصيت صديقي صطوف يجيب لي الواح خشبيه لاجل اصلح سياج حديقة بيتي عصر يوم السبت دقيت على بعض ربعي من ايام المدرسه حضرعندي حميدي صديق طفولتي ( زوج اختي بالرضاعه ) خالد زوج بنت خالي ابو حاتم , فواز , سطام , صطوف , عامر انزلنا الواح الخشب من سيارة صطوف البيك اب هايلكس موديل 2014 بدينا ندق الشبك على الواح الخشب ونثبتها بالمسامير وكان يساعدنا ابني ضاري بعد حوالي ساعه ونص خلصنا خلال تصليح سياج حديقة البيت الشاي والقهوه ما توقفت وبعدها كانت ام عيالي جهزت الغدا لي وللربع البعض صار يتعذر لانه تغدا في بيته حلفت يمين إلا يتغدون معي جلسنا ما إن بسملنا واول لقمه اذا البغل يندفع لحوش البيت ويلاحقه عيال ابو عبدالله طلعنا نشوف ويش السالفه كان باب حوش البيت مغلق حصرنا البغل امسكت بحبل طويل وسويت طرفه على شكل انشوطه وخوياي فواز وحميدي كل منهم سوا مثلي وقفت على صخره مرتفعه حوالي 3 امتار صرت اطوح بالحبل وارميه على البغل حين جت انشوطه على رقبة البغل شديتها قام ابني سطام يطلع من البيت صارخت عليه لاجل يرجع للبيت كمل طريقه تركت الحبل وقفزت من فوق الصخره وحملت سطام ورجعت للبيت البغل انتهز الفرصه وهاجمني بفضل الله تعالى تفاديت هجومه ودخلت بين جدار البيت وجدار حوش البيت الربع يصارو يشاغلون البغل بالحبال لين ابتعد عن مكاني ارجعت سطام للبيت ورجعت لباب البيت حاولت امسك الحبل اللي في رقبة البغل واشده الانشوطه اللي ساواها فواز جت في رقبة البغل وصار يشدها والربع يساعدوه امسكت طرف الحبل اللي سويته انشوطه وجت في رقبة البغل وصرت اشده وعيال ابو عبدالله يساعدوني لين ثبتنا البغل حميدي زوج اختي بالرضاعه صار يرمي الحبل على ارجول البغل لين التف الحبل على ارجول البغل صرنا نشده بركاده لين ضمينا ارجول البغل على بعضها فوقع على التراب عيال ابو عبدالله ما انتظرو بسرعه صارو يحطون القيود الحديديه في ارجول البغل الاربعه والبسوه رسنه حينها فكينا الحبال اللي على ارجوله والحبال اللي في رقبته وقف البغل على ارجوله عيال ابو عبدالله اخذو البغل لبيتهم رجعت مع ربعي كملنا غدانا وبعدها توجهنا لبيت خالي ابو حاتم ومن هناك رحنا لبيت ابو عبدالله جلسنا عنده قلت له : يا ابن الخال اربط هالدابه هاذ اذا فلت من رباطه ترى الله يستر من سواياه هاذ المره الثالثه اللي يفلت حطم سياج حديقة بيتي وهجم على حصاني واكل وخرب حديقة جاري ابو عوده وما ودي عوض عن خسايري وابو عوده ما يطالبك بتعويضه عن خسايره لكن هالدابه اذا فلت مره رابعه الله العالم ويش تكون نتايجها بلغت خساير جاري ابو عوده 300 دينار رفض ياخذها خسايري ماهي هالمبلغ الكبير رفضت اخذها لانها مو مستاهله وعيب اخذها من ابو عبدالله امس الاحد مريت من جنب حظيرة ابو عبدالله اذا البغل مقيد برجوله الاربعه حين شافني صار يحاول يقطع قيوده قلت له : لا تتعب نفسك ترى ما ينفع معاك الا هالقيود هاذ تمنع اذاك وسواياك الشينه عن اهل الديره هاذ البغل نتاج لقاح حمار وانتم بكرامه بفرس غير اصيله ملك لابو عبدالله والحمدلله خلال هاليومين امس واليوم ارتحنا من غثا هالجامح وسلامتكم يالربع |
| الساعة الآن 11:46 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir