|
سالفتي مع البغل الجامح السلام عليكم ورحمة الله وبركاته مسيكم بالخير الجميع احد ابناء خؤولة شايبتي كان عنده فرس مو اصيله ولقحت من حمار وانتم بكرامه فانجبت بغل وكبر هالبغل وصار ضخم الحجم ولونه احمر يميل للسواد وانتم بكرامه وهاذ البغل طبعه هادي راعيه يستخدمه لاغراض الزراعه والحراثه قبل حوالي شهرين تغيرت طباع هالبغل وصار ما ان يطلع من الحوطه ينطلق في شوارع الديره ويحوس حدايقها ما يخلي شارع الا يتفقده قبل وصول المنخفضات الجويه اللي وصلتنا محمله بالامطار والغيث والحمدلله قبل حوالي 8 ايام انتهت امس زرعت قسم من حديقة البيت طماطم مو للتجاره لاستخدام اهل البيت في صبيحة يوم من الايام قرابة الساعه 10 صباحا كنت في حوش البيت تفاجأت بهاذ البغل وانتم بكرامه كان منطلق بسرعه فدخل حديقة جاري ابو طالب حاسها ووصل حديقة البيت وكان في حالة هيجان شديده ابتعدت عنه مسافه حوالي 10 امتارفحاس نص الحديقه وناظرني وكانه يقولي حست نص الحديقه ولا تواخذني كنت في حاله عصبيه ما سيطرت على نفسي وانطلق صوب باب الحوش ومنه للشارع وكانه لهيب نار ما شاء الله يسبق الريح الهبابي سمعت شخص يناديني عرفته من صوته جاري ابو طالب توجهنا لراعي هالبغل خؤولة شايبتي جلسنا معاه وقلت له : يا خالي يا ابو عبدالله وانت تذكر الله ( لا إله إلا الله محمد رسول الله ) هالدابه اللي عندك دخل حديقتي وخرب ما خرب منها زرعتها طماطم لاهل البيت والله المستعان جاري ابو طالب قله : ودخل حديقتي مزروعه برسيم فحاسها والله المستعان ويش الراي والتدبير مع هالدابه رد علينا بقوله : يالربع اذا ودكم اعوضكم عن خسايركم هالدابه ما عدت اقدر اسيطرعليها يالربع قطع سلسله حديديه ورب البيت اني خجلان منكم يالربع حطينا عالجرح ملح وسكتنا ابن راعي البغل كان يلاحق البغل في شوارع الديره لين اولاد الحلال ساعدوه انهم امسكوه وربطوه ورجعوه لراعيه وهو مقيد بيدينه ورجوله الاربعه جبت الواح خشبيه وشبك ودقيت على ربعي ساعدوني بالسياج سويت حوطه على هالحديقه والحمدلله ثاني يوم سمعت صوت ضجيج بالحوش اذا هالبغل في الحوش وهو يطلع ذاك الشحيج ما عدت اقدر اتحمل هالازعاج امسكت بمسدسي ولقمته مشط الرصاص وطلعت وصرت اطلق النار قريب من ارجول البغل وهو يسمع صوت اطلاق الرصاص انحاش فحاس حديقة جاري ابو طالب وحديقة جاري ابو عوده وانطلق وكمل طريقه فحاس كل حديقه بطريقه لين وصل مزرعة خالي ابو اسماعيل وبما انه الباب مفتوح فدخل المزرعه يتبختر ما حد يقدر يصده العمال اغلقو الباب وحصروه بعد ما ربطوه وقيدوه دقو على راعيه فراح جابه من مزرعة خالي اليوم الثالث كنت مع خالي ابو حاتم وحرمته وزوجات اولاده وزوجتي واختي وبنتها في حديقة بيته وهاذ الحديقه مزروعه فول بلدي وكانت عمتي ام حاتم اطلقت النعجات والشاه الشاميه في حديقة البيت واذا البغل يدخل الحديقه بدون استأذان وهجوم شرس على محارمنا فصابهن الفزع وابتدا البغل التفنن في تخريب الحديقه وزرعها واندفع صوب الشاه الشاميه يعضها من ظهرها ويطوحها في الهوا ويرميها اذا رجلها اليمين مكسوره انجبرت مع خالي نطلق النار في الهوا بسبب اطلاق النار انحاش البغل والناس تجمعت يستفسرون عن سبب اطلاق النار اذا رجاجيل ينادون خالي ابو حاتم رد عليهم اشتكو له انه هالبغل حاس حديقه واسعه لهم وخرب زرعها قلت بصوت عالي : خلص ما عاد عندي صبر هاذ الامر ما ينسكت عليه لا بد من وضع حد لهالغل الجامح ما خلا حديقه الا خربها واتلف زرعها وبعدين وبعدين يبه وحده من ثنتين اما انه ابو عبدالله يربط هالدابه ويمنع اذاها عن الناس او انه هالبغل وكاد راح يورطه في مشكله عويصه توجهنا لبيت ابو عبدالله لقيناه في الشارع يشد بحبل رسن هالبغل والبغل يتراجع للخلف ويرافس برجوله وما في فكاك البغل معروف انه شديد العناد بصعوبه لين قدرت 6 رجاجيل تسيطر عليه وتدخله الحوطه ويربطوه خالي قال : يا ابن خالي يا ابو عبدالله وبعدين في هالبغل الجامح كل يوم ينطلق في شوارع الديره ويحوس حدايقها ويتلف زروعها ما خلا حديقه الا حاسها حديقة ابو ظاري وابو عوده وابو طالب حتى مزرعة اخوي ابو اسماعيل ما سلمت من اذاه وشره حتى بيوت شرق الديره حاسها على مدى 3 ايام يا ابن الخال ضاق صدرنا اليوم جيراني يشتكون لي البغل حاس حديقتهم وخرب زرعها وفوق هاذ افزع حرمتي ومحارمي وكاد يقتل الشاه اتق الله فينا يا ابن خالي ما ظل متسع للعفو في الصدر يا ابو عبدالله انصحك نصيحه لوجه الله تعالى اربط هالبغل ولا تتخليه ينطلق في شوارع الديره ما اضمن شخص يستعجل ويطلق عليه النار وتكون انت الخسران ابو عبدالله قال لخالي : ابشر ودي اريحكم وارتاح من غثاه احضر قيود حديديه وحاول انه يحطها في ارجول البغل وبدا البغل يرافس برجوله وعلا صوت شحيجه استخدمنا حبال طويله وبعد وقت وجهد جهيد لين لففناها حول ارجوله وثبتناها لين حطينا القيود الحديديه في ارجوله وحينها ما عاد يقدر يطارد ويحوس الديره مثل اول اليوم الصبح قرابة الساعه 45: 9 دقيقه رحت اشوف خالتي ام متعب لقيت سعد ولد ابو عبدالله يحرث قطعة ارض صغيره لهم على الطريقه البدائيه كان يحرث الارض على البغل وهو مقيد برجوله اليمين وارجوله اليسار بدون قيود طرحت السلام على سعد رد علي السلام وقلي : يا ابو ظاري يا ابن عمتي ترى اذا فكينا القيود اللي على ارجوله الديره ما تقدر تسيطر عليه مدري ويش بلاه من شهرين وهو يغثنا كاد يوقعنا بمشاكل لها اول ما لها تالي خالي ابو حاتم دق على صديق عمره الوفي ابو مرزوق وسولف له السالفه جا ابو مرزوق وعاين الشاه وتفحصها بالكامل وخاصه رجلها المكسوره وقال : ما عليها خلاف لكن رجلها يلزمها تجبير وابو مرزوق له خبره وباع طويله في هاذ الامر سوا لها تجبير والحمدلله الشاه تحسنت وصار لها حوالي 12 يوم وصارت تمشي بركاده على رجلها المكسوره صديقنا ابو مرزوق حباه الله سبحانه وتعالى بعدة امور فهو قصاص اثر متمرس وله خبره في علاج الاغنام وكان قد خدم في العسكريه وانهى خدمته العسكريه قصاص اثر برتبة ملازم وتربطني به علاقة صداقه وطيده فهو كان صديق والدي رحمه الله واموات المسلمين وسلامتكم يالربع |
| الساعة الآن 06:55 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir