|
تعلمو ا منا حنا الشيبان السلام عليكم ورحمة الله وبركاته . مسيكم بالخير الجميع . في فترة طفولتي صارت هالسالفه بين الاقرباء من العشيره توجه شاب للبقاله وده يشتري علبة حمص حين دخل البقاله كان هناك طفل عمره 5 سنوات من ابناء الاقارب في العشيره الشاب قال للطفل : ابعد شوي ودي آخذ علبة الحمص رد الطفل على قريبه : ابوك والد الشاب ووالد الطفل يلتقون في الجد الثاني في العشيره اولاد عم الشاب صفع الطفل صفعه لكن ما هي قويه راح الطفل يبكي لشايبه انه ولد عمه صفعه لانه شتم والد الشاب الاب قال لابنه : اذا انت غلطان ليش تشتم والده يكون ولد عمي الولد هاذ ما اعجبه رد شايبه فصبر لين جا اخوه الكبير وبلغه بالسالفه بعد العصر جلسوا الشيبان على باب البقاله يسولفون اذا اخو الطفل الكبير يمشي بالشارع وحاط المسدس على خاصرته شافه جدي رحمه الله واموات المسلمين فقاله : وين وين عفلاح الله ومعلق مسدسك على خاصرتك ؟ رد عليه اخو الطفل : هاذ ولد عمي وده تأديب لزوم اطقه لاجل ما يمد يده على اخوي مره ثانيه . جدي رد عليه : اسمع يا ولد روح للبيت ورجع المسدس معاك ولا تخليني اتعصب عليك .السالفه منتهيه لحالها اخوك غلط وابنك عمك غلطان وخلصنا الشاب عاند جدي وقله : ابد ما ارجع إلا حين اطق ولد عمي . جدي تعصب وقله : يا ولد ما عندي كبير البعير على كبره بعيني صغير وراح صفعه على وجهه ذيك الصفعه تهيأ لي الديره كلها سمعت صوتها فوقع الشاب على الارض من قوة الصفعه جا والد الشاب وقله : سمعت شيخ العشيره قالك روح البيت يعني تروح البيت واخذ المسدس وعطاه لخالي ابو حاتم وطلب منه يخليه عنده وقال لجدي : امسحها فيني يا شيخ زلة ولد جاهل جدي صار يستغفر الله استغفر العظيم من كل ذنب عظيم واتوب اليه لا إله إلا الله محمد سول الله . جلسوا الشيبان وسولفوا بالموضوع اخوكم ومحدثكم العبد الفقير لله كان جالس ودوري اصب القهوه واقدم الشاي للموجودين من الشيبان وصار وقت صلاة المغرب قلي جدي : يلا يا حمود روح توضا لاجل تروح معنا للمسجد نصلي المغرب جماعه . رحت بالحال توضيت ورحت مع الشيبان للمسجد صلينا المغرب جماعه ورجعنا للديوان وجلسوا الشيبان صبيت لهم القهوه وجلست جنب خالي ابو حاتم جا الشاب ووالده ودخلوا الديوان وطرحوا السلام علينا ردينا السلام قمت صبيت لهم القهوه الشاب جلس قدام جدي وقاله : اسف يا جدي ما كان قصدي اعاندك وما ارد عليك قدام الربع انت شيخنا وكبيرنا واحترامك واجب علينا كلنا رد عليه جدي وقله : الله يرضى عليك تدري اني زعلان لاني صفعتك مو مبسوط اجبرتني على هاذ الامر مافي يوم واحد من الربع قلي لا تعلموا منا حنا الشيبان المشكله منتهيه لحالها لو انك رحت لولد عمك وتضاربتوا وانطلقت رصاصه وعورت ولد عمك اذا ارضينا بني عمنا ما نخلص مع الحكومه فيها تحقيق ونيابه وحبس وغرامه . حنا الشيبان نحل الامور الصعيبه بإذن الله عز وجل تعلموا منا كيف نسوس الامور ويش نقول حين نجلس نحل اي اشكال جدي ارسلني للشاب اللي صفع ابن عمه ولشايبه وجونا على الديوان بعد ما جلسوا وصبيت لهم القهوه جدي قال للشاب : يا ولدي انت غلطان لانك صفعت ولد عمك هاذ طفل ما يفهم الصح من الغلط ما يميز الزين من الشين وانت بعد لزوم تفهم ولدك انها الشتيمه غلط وطلب منهم يصافحوا بعض ويتعذروا لبعض وهاذ اللي صار الشاب اللي تلقى الصفعه على وجهه مدة 3 ايام ووجنته منتفخه ولونها ازرق بسبب قوة الصفعه للحين يتذكرها وعمره الحين 67 سنه . بعد ما طلعوا الشيبان من الديوان رجعت مع جدي للبيت قلي : يا حمود خذها نصيحه الغضب اوله جنون واخره ندم اياك انكتتصرف وانت غضبان ومتعصب احتلم قبل لا تتصرف اكظم غيظك رسولنا الكريم صلى الله عليه وسلم قال ليس الشديد بالصرعه انما الشديد الذي يملك نفسه عند الغضب صدق رسولنا الكريم صلى الله وعليه وسلم . توفي جدي رحمه الله واموات المسلمين عام 1982 ميلادي وقد بلغ من العمر 90 سنه وكان ما زال يتمتع بصحه جيده . وسلامتكم يالربع . |
| الساعة الآن 05:18 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir