رفيقي ابغث داخل الهيل مسمار=واعدل مزاج اللي بعيدن مسيره
ضوا علينا الليل والخرب ما طار=والا الدجاجه بالخلا مستذيره
دور لنا بطحا الذرا نشعل النار=لين الضحى ياتي عسى فيه خيره
بنيت انا وياه بالجلسه وجار=وادنيت كاتم مستلجن صفيره
والطير خليناه في لايذ الغار=نرجي عسى رب الخلايق يجيره
يمكن علينا باخر الليل الامطار=شفنا مع المنشا بروقن تنيره
قضينا جلستنا على كيف واشعار=عقب العشا شاهي وتكيه قصيره
يوم اركدن بيض اللوامع بالانظار=والليل باقصى الكون ولا كثيره
سمعنا صوت رعودها حسها ثار=ودلا صبيب الغيث يرشق غزيره
ضفينا عدتنا والامزان نثار=تكيت باقصى الغار عيني قريره
انا تراكيت بحصاتن بها غبار=وتساند الصاحب على وكر طيره
سهرنا ليلتنا رضينا بالاقدار=والما سمعنا بالرجايب خريره
لين استبان بواسع الكون الاسفار=واذن صحيبي فوق رجبه كبيره
ادينا فرض الدين مع قول الاذكار=والما نشوفه طافحن في غديره
واتسيح قطرات الندى فوق الازهار=روس الشجر تنفض علينا ذريره
وافطرنا تمر خلاص مع قرص مجمار=ومشينا نقنص بين طعس وزبيره
انا على النيسان وافلان فكس آر=والكل منا مستطيب السريره
نريد وين الخرب راقد بالاقفار=خبري به مسيان لاذ بفريره
شفنا مواطيه بغرينه بها سار=لين اختفى بين الشعوف الصغيره
واثري لقيته لابدن بين الاشجار=ودليت انادي صاحبي واستشيره
جاوب ترا جيتك تقل فيني الزار=فرحان مدري وش دهاني بحيره
لما بقى له ياصل الصيده امتار=والجيب بالبطناج توحي صريره
كوبر تعيس الحال بالعرفج وطار=شلع وراه الطير ما راح ديره
عطا له القرناس كفيه واندار=والمخلب الاول نشب في مصيره
والمخلب الثاني توشظ بمنخار=والبوز من بين الثنادي مزيره
تباشر الصاحب وكبس لي انوار=باركت له نسل الوجيه السفيره
رحنا على طعسن بدا فيه مبذار=واشعلنا الارطا والهوا ما يثيره
طبخنا صيدتنا بها الثوم وابزار=والكبسه بشعلان ماحلا نثيره
واقفى نهار اليوم والخير مدرار=من واحدن ما للمخاليق غيره